Аляксандр Лукашэнка сёння сустрэўся з губернатарам Архангельскай вобласці Расіі Аляксандрам Цыбульскім. Як звычайна, ён выступіў за рост тавараабароту з рэгіёнам, але таксама вырашыў падкрэсліць сваю значнасць.
Паводле слоў Лукашэнкі, сёння яму даводзіцца быць на фронце разам з Расіяй і паспяхова стрымліваць праціўнікаў.
“На шчасце ці няшчасце, нашы магчымасці апошнім часам узраслі ў напрамку Расіі. Нам сёння даводзіцца разам з вамі быць на фронце. Нікуды ад гэтага не падзецца. Значэнне Беларусі ў сувязі з тымі падзеямі, якія адбываюцца вакол нас, узрастае.
Мы ведаем сваю ролю, якую трэба адыграць у гэтым свеце. Паспяховасць гэтай ролі шмат у чым будзе залежаць ад таго, якімі будуць адносіны ў нас з Расійскай Федэрацыяй. Пакуль усё ідзе нармальна. Нам удаецца тут і папярэджваць, і стрымліваць патэнцыйных нашых праціўнікаў, скажам так, не ворагаў пакуль, а праціўнікаў. Яны разумеюць, што мы не спім тут. А калі і спім, то бачым тое, што мы павінны бачыць”, – сказаў ён, перадае яго прэс-служба.
Лукашэнка таксама звярнуў увагу, што тавараабарот з Архангельскай вобласцю знізіўся ў тры разы. Яго трэба аднаўляць.
“Усё ў нашых сілах. Мы мелі прыкладна ў тры разы вышэйшы тавараабарот, чым цяпер. Трэба яго аднаўляць, шукаць адпаведныя шляхі. І нам у тым ліку. Не чакаць за дзвярыма ці за плотам, што нехта прыедзе і прапануе варыянты. Трэба знайсці ўзаемапрымальныя інтарэсы, каб выйсці хаця б на той узровень, які ў нас калісьці быў. Калі ўжо шчыра гаварыць”, – дадаў ён.
Ён таксама абазначыў асноўныя “інтарэсы” ў такім супрацоўніцтве. Лукашэнка прапанаваў расійскаму рэгіёну лесанарыхтоўчую тэхніку “Амкадора”, таксама ён згадаў рабатызаваныя комплексы БелАЗа, якія ўжо працуюць у вобласці.
«У вас нямала працуе нашай тэхнікі, у тым ліку і пасажырскай, я маю на ўвазе Мінскі аўтамабільны завод. Нядаўна пабудавалі новы завод для вытворчасці пасажырскай тэхнікі. У гэтым напрамку мы гатовыя з вамі супрацоўнічаць», – сказаў ён.
Яшчэ адна прапанова датычыцца паставак ліфтаў. Таксама Лукашэнка прапанаваў пастаўкі харчавання і супрацоўніцтва ў адукацыі. Нарэшце, ён адзначыў і перспектывы працы ў сферы ВПК.
“Арктычная зона сёння – зона інтарэсаў, сутыкненняў. Калі, зноў жа, мы будзем чымсьці вам карысныя, мы заўсёды будзем супрацоўнічаць. Мы шмат чаго навучыліся рабіць самі з дапамогай Расіі. Пачыналі з расіянамі. Сёння вырабляем дастаткова для патрэб ВПК. Я не хаваю такое супрацоўніцтва, у тым ліку і цяпер, нашага ваенна-прамысловага комплексу з вашымі прадпрыемствамі, Міністэрствам абароны, сёння існуе, учора існавала і будзе існаваць. Таму паглядзіце, можа, вам нейкія тэхналогіі будуць прыдатныя”, – сказаў Лукашэнка.
