Міліцыя і СК расказалі пра раскрыццё разбойнага нападу на ювелірную краму, учыненага 21 жніўня. Зламысніка затрымалі праз дзень.
Як расказаў начальнік галоўнага ўпраўлення крымінальнага вышуку крымінальнай міліцыі МУС Аляксандр Копішаў, зламыснік у медыцынскай масцы, пагражаючы прадметам, падобным на пісталет, работнікам крамы “Самоцвет”, завалодаў ювелірнымі вырабамі і ўцёк. Ён прабыў у краме менш за хвіліну. Прадаўшчыца крамы паспела націснуць трывожную кнопку.
Сышчыкі змаглі ўстанавіць дом, у якім схаваўся нападнік. Абследаваўшы пад’езды, яны знайшлі маску, пальчаткі, сумку і скрынкі з-пад ювелірных вырабаў. Асоба нападніка была ўстаноўлена ў выніку правядзення генатыпічнай экспертызы знойдзеных рэчаў. Ім аказаўся 34-гадовы грамадзянін Беларусі. Стала вядома, што ён ужо едзе на аўтобусе з Мінска ў Санкт-Пецярбург. Мужчыну затрымалі пры падтрымцы атрада “Алмаз”.
Было ўстаноўлена, што зламыснік апошнія гады жыў у Расіі. Аднак у маі гэтага года ён вярнуўся ў Беларусь, нідзе не працаваў. Ён рыхтаваўся да нападу. Мужчына неаднаразова наведваў краму, абследаваў тэрыторыю побач з ёй, рыхтуючы шляхі адыходу, каб не трапіць на камеры назірання.
Затрыманы даў поўныя і дэталёвыя паказанні.