Савет міністраў Беларусі пастановай №203 ад 25 красавіка ўвёў асаблівыя ўмовы працы аўдытараў з арганізацыямі, якія маюць асаблівую эканамічную значнасць. Дакумент сёння апублікаваны на Нацыянальным прававым інтэрнэт-партале і ўступае ў сілу пасля апублікавання.
У адпаведнасці з ім, аказваць аўдытарскія паслугі арганізацыям, якія маюць асаблівую эканамічную значнасць для Рэспублікі Беларусь, змогуць толькі аўдытарскія арганізацыі і аўдытары-ІП, вызначаныя Мінфінам. Пералік арганізацый, якія маюць асаблівую эканамічную значнасць, зацверджаны пастановай, не разгалошваецца. Ён схаваны пад грыфам “для службовага карыстання”.
Дакументам таксама ўстанаўліваецца шэраг асаблівасцяў аказання аўдытарскіх паслуг такім арганізацыям:
- аўдытары павінны працаваць на тэрыторыі арганізацыі з фізічнай прысутнасцю,
- не дапускаецца перадача інфармацыі аб дзейнасці арганізацыі па адкрытых каналах перадачы даных,
- не дапускаецца захоўванне інфармацыі аб дзейнасці арганізацыі ў інфармацыйных сістэмах, падключаных да адкрытых каналаў перадачы даных,
- арганізацыя забяспечвае назіранне за распаўсюджаннем і прадастаўленнем інфармацыі, распаўсюджанне і прадастаўленне якой абмежавана,
- не дапускаецца капіраванне аўдытарамі дакументаў з інфармацыяй,
- аўдытары складаюць дакументы з выкарыстаннем інфармацыі, распаўсюджанне і прадастаўленне якой абмежавана, толькі на папяровым носьбіце і адносяць яе да інфармацыі абмежаванага распаўсюджання.
Дагаворы аказання аўдытарскіх паслуг, заключаныя да ўступлення ў сілу пастановы, дзейнічаюць на ранейшых умовах да заканчэння іх тэрміну і не падлягаюць прадаўжэнню.
Мінфіну даручана штогод да 1 лістапада ўносіць у Савет міністраў па ўзгадненні з Мінэканомікі карэкціроўкі ў пералік арганізацый, якія маюць асаблівае значэнне, а таксама вызначаць пералік аўдытарскіх арганізацый і аўдытараў-ІП, дапушчаных да аказання паслуг для такіх арганізацый.