Расійскія спартсмены на зімовых Алімпійскіх гульнях у Мілане-Картыне не змогуць прадстаўляць сваю краіну, нават калі будзе дасягнута мірнае пагадненне з Украінай. Пра гэта заявіла прэзідэнт Міжнароднага алімпійскага камітэта Кірсці Ковентры у інтэрв’ю Corriere della Sera у адказе на пытанне пра тое, ці дапускаецца такая магчымасць.
«На дадзены момант нічога не зменіцца ва ўжо прынятым рашэнні: спартсмены будуць выступаць толькі ў якасці індывідуальных прадстаўнікоў», — заявіла яна.
Нагадаем, МАК забараніў удзел Расіі і Беларусі пасля поўнамаштабнага расійскага ўварвання ва Украіну ў лютым 2022 года. У верасні МАК пакінуў у сіле ўмовы допуску для беларускіх і расійскіх спартсменаў на зімовыя Алімпійскія гульні ў Мілане-Картыне ў 2026 годзе.
Гульні ў Мілане-Картыне пройдуць з 6 па 22 лютага.