Аляксандр Лукашэнка накіраваў спачуванне прэзідэнту Ірана Масуду Пезешкіяну ў сувязі з гібеллю Вярхоўнага лідара Ірана Алі Хаменеі, паведамляе прэс-служба Лукашэнкі. У якасці прычыны “гібелі” ў паведамленні ўказваецца “вераломная атака”.
«З глыбокім болем і смуткам у Рэспубліцы Беларусь успрынялі трагічную навіну пра гібель Вярхоўнага лідара Ісламскай Рэспублікі Іран Алі Хаменеі ў выніку вераломнай атакі.
На працягу дзесяцігоддзяў ён служыў народу, нязменна кіруючыся вернасцю традыцыям і адказнасцю перад будучымі пакаленнямі. Сваёй мудрасцю і дальнабачнасцю атрымаў высокае прызнанне і карыстаўся заслужаным аўтарытэтам далёка за межамі дзяржавы.
Духоўны лідар заставаўся верным свайму народу да апошняга ўздыху і мужна прыняў пакутніцкую смерць, адстойваючы суверэнітэт і незалежнасць Ірана.
Памяць пра Алі Хаменеі, яго служэнне краіне застанецца ў сэрцах мільёнаў людзей. Яго жыццёвы шлях застанецца часткай нацыянальнай спадчыны Ірана і важнай старонкай сусветнай гісторыі», – падкрэсліў Лукашэнка.
Як паведамляе яго прэс-служба, Аляксандр Лукашэнка адзначыў, што меў гонар сустракацца з гэтым выдатным дзяржаўным дзеячам, які ўнёс вялікі ўклад у развіццё ўсебаковага супрацоўніцтва паміж Іранам і Беларуссю.
“Яго добрае імя і мужнасць застануцца ў нашай памяці”, – гаворыцца ў паведамленні.
«У гэты смутны час ад імя беларускага народа і сябе асабіста накіроўваю шчырыя словы спачування і падтрымкі. Падзяляем боль страты і выказваем салідарнасць з Іранам у такі цяжкі момант», – адзначыў беларускі кіраўнік.
Характэрна, што ў спачуванні няма згадкі пра ЗША і Ізраіль, сумесная атака якіх і прывяла да знішчэння іранскага лідара.
