Аляксандр Лукашэнка павіншаваў Мін Аун Хлайна з абраннем на пасаду прэзідэнта М’янмы.
Сёння лідара хунты, які здзейсніў пераварот у 2021 годзе, абраў на пасаду прэзідэнта парламент, у якім большасць мае Партыя саюза салідарнасці і развіцця і прызначэнцы ваенных.
“Перакананы, што багаты досвед дзяржаўнага дзеяча, прафесійныя і асабістыя якасці дазволяць вам паспяхова ажыццяўляць кіраўніцтва М’янмай, забяспечваць стабільнасць і сацыяльна-эканамічнае развіццё краіны”, — гаворыцца ў віншаванні.
Лукашэнка таксама адзначыў актыўную дынаміку беларуска-м’янманскіх адносін, якая назіралася ўвесь 2025 год. У мінулым годзе ён абмяняўся візітамі з Мін Аун Хлайнам. У віншаванні таксама пацвярджаецца нацэленасць Беларусі на рэалізацыю дасягнутых дамоўленасцей для далейшага ўмацавання сувязяў з М’янмай і выказваецца надзея на новыя сустрэчы.
