Дзяржстандарт Беларусі забараніў ТАА «ДНС ЭЛЕКТРОНІКА» рэалізацыю 116 найменняў прадукцыі, на якую не былі прадстаўлены дакументы аб ацэнцы адпаведнасці. Акрамя таго, ведамства прызначыла пазапланавую праверку кампаніі.
Парушэнні выявілі падчас маніторынгу, праведзенага інспекцыямі Дзяржстандарту ў жніўні — верасні 2026 года ў 14 крамах сеткі лічбавай і бытавой тэхнікі DNS.
Паводле даных ведамства, у гандлёвых аб’ектах прадавалася імпартная бытавая тэхніка шэрагу марак без сертыфікатаў адпаведнасці, якія пацвярджаюць яе энергаэфектыўнасць. Наяўнасць такіх дакументаў з’яўляецца абавязковай умовай для рэалізацыі прадукцыі на беларускім рынку.
Акрамя таго, на некаторыя мадэлі халадзільнікаў і пральных машын кампанія не прадставіла дакументы, якія пацвярджаюць адпаведнасць абавязковым тэхнічным рэгламентам Еўразійскага эканамічнага саюза. Яны датычацца бяспекі нізкавольтнага абсталявання, электрамагнітнай сумяшчальнасці і абмежавання выкарыстання небяспечных рэчываў у электратэхнічных і радыёэлектронных вырабах.
Дзяржстандарт нагадаў, што прадавец абавязаны па першым патрабаванні пакупніка прад’явіць сертыфікаты або дэкларацыі аб адпаведнасці, якія пацвярджаюць бяспеку і якасць тавару.
Усяго па выніках наглядных мерапрыемстваў у першым паўгоддзі 2026 года ў Беларусі забаранілі ўвоз і рэалізацыю 111 найменняў электратэхнічнай прадукцыі, уключаючы лямпы, свяцільнікі і электраінструменты.
***
ТАА «ДНС ЭЛЕКТРОНІКА» — беларуская юрыдычная асоба, якая кіруе крамамі расійскай сеткі DNS у Беларусі. Сетка спецыялізуецца на продажы камп’ютараў, смартфонаў, бытавой і іншай электронікі. Кампанія зарэгістравана ў Мінску 3 студзеня 2024 года. Першая крама DNS у Беларусі адкрылася ў маі 2024 года.
