У Мінску плануюць дабудаваць некалькі буйных транспартных развязак і пуцеправодаў, якія павінны сфарміраваць паўнавартаснае трэцяе транспартнае кальцо. Пра гэта старшыня Мінгарвыканкама Уладзімір Кухараў заявіў у эфіры тэлеканала «Беларусь 1».
Паводле яго слоў, два існуючыя транспартныя кальцы і МКАД ужо не спраўляюцца з патокамі аўтамабіляў, асабліва ў гадзіны пік. Новыя развязкі будуць будаваць перш за ўсё на ўчастках, дзе трэцяе кальцо перасякаецца з чыгункай або воднымі артэрыямі. Цяпер вядзецца будаўніцтва злучэння вуліцы Калеснікава з вуліцай Ціміразева. Завяршыць яго плануюць у 2026 годзе.
Акрамя таго, у найбліжэйшыя гады маюць намер пабудаваць яшчэ тры пуцеправоды – на скрыжаванні вуліцы Чурлёніса з вуліцай Каржанеўскага, вуліцы Сярова з вуліцай Шпілеўскага, а таксама праз Свіслач, які злучыць Лошыцу і Серабранку.
“Мы плануем на працягу трох гадоў завяршыць гэты праект. Ён дазволіць значна палепшыць транспартны складнік горада. Акрамя таго, ёсць сур’ёзная праблема – вялікагрузныя аўтамабілі. Беларускі лідар падтрымаў прапанову Мінгарвыканкама аб будаўніцтве дарогі з найбуйнейшага прамысловага цэнтра – Калядзічы – на другую кальцавую дарогу. У 2027 годзе завершым будаўніцтва пуцеправода, які забяспечыць выезд з прамцэнтра Шабаны на кальцавую дарогу па вуліцы Сяліцкага, якая дазволіць ужо аўтамабілям ехаць не на першую кальцавую дарогу, а на другую”, – адзначыў кіраўнік Мінгарвыканкама.
Адначасова ўлады маюць намер абмежаваць рух вялікагрузаў па МКАД і перанакіроўваць іх патокі на другую кальцавую дарогу.
У Мінску таксама працягнуць пашыраць сетку платных парковак. Цяпер у горадзе налічваецца больш за 9 тысяч платных парковачных месцаў, а да канца 2026 года іх колькасць плануюць давесці да 10 тысяч.
Акрамя таго, гарадскія ўлады збіраюцца абсталяваць паркоўкі і паркінгі зараднымі станцыямі.
“Мы будзем забяспечваць паркінгі і стаянкі зараднымі прыладамі. У горадзе маецца больш за 30 тысяч электразарадных аўтамабіляў, да канца 2030-га іх колькасць можа перавысіць 100 тысяч. Мы павінны для гэтага падрыхтаваць інфраструктуру”, – падкрэсліў старшыня Мінгарвыканкама.
Кухараў таксама заявіў, што будаўніцтва трэцяй лініі метро ў Мінску ідзе па графіку, а паведамленні пра перанос тэрмінаў на два гады назваў фэйкам.
Другую чаргу трэцяй лініі плануюць завяршыць у 2028 годзе. Яна пройдзе ад плошчы Бангалор да вуліцы Мельнікайтэ і будзе ўключаць тры станцыі.
“Мы закупілі другі тунэлепраходчы комплекс, які ўжо працуе пад зямлёй. Гэта значна паскарае працэсы. Мы можам паралельна працаваць па пракладцы тунэляў. Мы таксама спрасцілі пытанні вынасу сетак. Цяпер гэта дасць сур’ёзны вынік па паскарэнні тэмпаў. У 2027 годзе плануем пачаць будаўніцтва чацвёртай, кальцавой, лініі метро, якая дазволіць значна палепшыць транспартную лагістыку ў рамках метрапалітэна і прыняць значна большую колькасць пасажыраў”, – адзначыў ён.
