Дзяржаўны камітэт па навуцы і тэхналогіях Беларусі прыступае да стварэння Міжведамаснага савета па забеспячэнні тэхналагічнага суверэнітэту. Рашэнне аб яго стварэнні было прынята Саветам міністраў у маі.
Сёння на Нацыянальным прававым інтэрнэт-партале апублікавана пастанова ДКНТ №11 ад 22 ліпеня, якой зацверджана палажэнне аб функцыянаванні савета, а таксама шэраг іншых дакументаў. Яна ўступае ў сілу пасля апублікавання.
Савет узначаліць старшыня ДКНТ, у яго таксама ўвойдуць яго намеснікі, намеснікі міністраў асноўных міністэрстваў і старшыняў канцэрнаў, начальнік упраўлення прымянення і развіцця беспілотных лятальных апаратаў і сродкаў радыёэлектроннай барацьбы галоўнага ўпраўлення камандуючага ўнутранымі войскамі МУС, намеснік начальніка Генштаба, начальнік упраўлення ААЦ, першы намеснік старшыні прэзідыума Акадэміі навук.
Савет ствараецца для разгляду прапаноў дзяржорганаў і арганізацый аб уключэнні тэхналогій і тавараў у пералік крытычных тэхналогій і крытычных тавараў. Таксама савет будзе заслухоўваць інфармацыю дзяржаўных органаў аб мерах, якія прымаюцца па забеспячэнні тэхналагічнага суверэнітэту. Яго пасяджэнні будуць праводзіцца па меры неабходнасці, але не радзей за адзін раз на год.
Пастановай таксама зацверджана палажэнне аб фарміраванні пераліку крытычных тэхналогій і тавараў.