Дыпламатычны саветнік Святланы Ціханоўскай у эфіры LRT пацвердзіў, што асноўная частка Офіса Ціханоўскай будзе працаваць у Польшчы. Аднак прадстаўніцтва захаваецца і ў Літве, як і яго дыпламатычны статус.
„Магу пацвердзіць, што цяпер, хачу быць шчырым, адбываюцца змены. Цяпер мы карэктуем нашу мадэль працы і пашыраем сваю дзейнасць, асабліва ў Польшчы. Цяпер адбываецца такая трансфармацыя (…). Зразумела, што мы робім гэта таму, што бяспека з’яўляецца адным з галоўных фактараў (…), новая сітуацыя з бяспекай, гэтыя змены ўплываюць на тое, як мы працуем, і гэта адна з прычын, чаму мы пашыраем сваю дзейнасць“, — цытуе Кучынскага Delfi.
„Наша прысутнасць у Літве захоўваецца, офіс С. Ціханоўскай у Вільнюсе таксама застаецца, і наша праца тут, у Літве, будзе. Мы захоўваем нашу дыпламатычную акрэдытацыю“, — дадаў ён.
Нагадаем, мінулай восенню ў Літве прынялі рашэнне аб змене рэжыму аховы Святланы Ціханоўскай. Пасля гэтага пачалася дыскусія пра пераезд Офіса ў Варшаву. Тады ўцечкі не пацвердзіліся. У пачатку гэтага года СМІ зноў напісалі, што рашэнне аб пераездзе ў Польшчу ўжо прынята.
