Былы спецпасланнік прэзідэнта ЗША па Украіне Кіт Келаг лічыць, што ўступленне Беларусі ў вайну супраць Украіны азначае канец Аляксандра Лукашэнкі, а беларускае войска будзе разгромлена. Пра гэта ён заявіў, выступаючы на Чарнаморскім форуме бяспекі ў Адэсе.
На пытанне вядоўцы, ці існуе сёння рэальная пагроза ўварвання ва Украіну з боку Беларусі, Келаг адказаў, што гэта было б вар’яцтвам з боку Лукашэнкі.
«Я думаю, што прэзідэнт Лукашэнка, калі б ён вырашыў зрабіць нешта падобнае, паступіў бы абсалютна недарэчна. Гэта было б вар’яцтвам, таму што, як мне здаецца, яго сілы былі б разгромлены. У яго ўжо ёсць унутранае незадавальненне», — лічыць Келаг.
Келаг нагадаў, што сустракаўся з Лукашэнкам асабіста, калі ЗША вялі перамовы аб вызваленні палітвязняў. Пасля той сустрэчы ў чэрвені 2025 года былі вызваленыя 14 палітвязняў, у тым ліку Сяргей Ціханоўскі.
Келаг адзначыў блізкасць Лукашэнкі да Пуціна і заявіў, што нарошчванне сіл у Беларусі можа быць накіравана таксама на захад, але ён бы не турбаваўся з гэтай нагоды. Уварванне ва Украіну стане для Лукашэнкі канцом, лічыць ён.
«Я б не надта турбаваўся з гэтай нагоды. Пра гэта гавораць. Але калі на яго будуць ціснуць, каб ён пайшоў на такі крок, думаю, гэта, верагодна, стане канцом Лукашэнкі ў тым выглядзе, у якім мы яго ведаем, таму што яго сілы не змогуць супрацьстаяць украінскім войскам, асабліва на паўночным кірунку. Я ведаю, што гэта быў адзін з першапачатковых маршрутаў наступу на Кіеў, але я не бачу такога сцэнару ў будучыні. Зрабіць нешта падобнае было б выключна безразважна», — заявіў Келаг.
