Рэтранслятары на беларуска-ўкраінскай мяжы, якія выкарыстоўваліся для карэкціроўкі палётаў расійскіх беспілотнікаў, былі знішчаныя ўкраінскімі дронамі, заявіў прадстаўнік па абароне і нацыянальнай бяспецы АПК Вадзім Кабанчук.
«Рэтранслятары былі знішчаныя ўкраінскімі дронамі. Іх фізічна больш не існуе», — заявіў Кабанчук, не ўдакладніўшы крыніцу інфармацыі.
Кабанчук пракаментаваў словы намесніка міністра замежных спраў Беларусі Ігара Сакрэты, які папярэдзіў аб выкарыстанні «ўсяго патэнцыялу» ў выпадку перасячэння мяжы з боку Украіны. Прадстаўнік АПК заявіў, што беларускім уладам не варта размаўляць з Украінай мовай пагроз.
На думку Кабанчука, абмен ударамі паміж Беларуссю і Украінай можа прывесці да сур’ёзных наступстваў для Мінска.
«Можа быць закранута крытычная інфраструктура самой Беларусі, а пад пагрозай апынуцца жыцці нашых людзей, у тым ліку нашых хлопцаў, якія цяпер нясуць службу ва Узброеных сілах Беларусі», — лічыць ён.
Нагадаем, 19 чэрвеня прэзідэнт Украіны Уладзімір Зяленскі даў Аляксандру Лукашэнку тыдзень для таго, каб адключыць рэтранслятары для расійскіх дронаў, папярэдзіўшы, што ў адваротным выпадку Украіна знішчыць іх сама. На мінулым тыдні Зяленскі заявіў, што рэтранслятары былі выключаныя 22 чэрвеня.
30 чэрвеня галоўнакамандуючы УСУ Аляксандр Сырскі заявіў, што Беларусь уключала адзін рэтранслятар, але больш гэтага рабіць не будзе.
