У Афіцыйным журнале ЕС апублікаваныя нарматыўныя акты, якімі быў зацверджаны 21-шы пакет санкцый. У яго трапілі некалькі беларускіх юрыдычных асоб.
Так, у санкцыйныя спісы ўнесена ААТ «Мазырскі НПЗ». Да гэтага часу пад абмежаванні ЕС трапляў толькі адзін з двух беларускіх НПЗ — «Нафтан». Таксама ў спісы трапіла ТАА «Еўрапейская трэйдынгавая кампанія», зарэгістраваная ў Смаленску. Як вынікае з абгрунтавання, гэта даччыная юрыдычная асоба «Беларускай нафтавай кампаніі».
Пад санкцыі трапілі і некалькі арганізацый, звязаных з ВПК, у тым ліку тыя, якія былі фігурантамі расследаванняў БРЦ і BELPOL:
- ТАА «Чып і Дып»,
- ААТ «Рагачоўскі завод “Дыяпраектар”»,
- ААТ «КБ Дысплэй».
- ЗАТ «Завод карпусных вырабаў».
Гэтым прадпрыемствам забаронена пастаўляць тэхналогіі.
Еўрасаюз пашырыў абмежаванні для грамадзян Беларусі ў сферы крыптавалют. Летась грамадзянам Беларусі або фізічным асобам, якія пражываюць у Беларусі, забаранілі прама ці ўскосна валодаць або кантраляваць, а таксама займаць пасады ў кіруючых органах юрыдычных асоб, зарэгістраваных у ЕС і якія аказваюць паслугі крыптакашалькоў і кіравання крыптаактывамі. З 25 жніўня гэтая забарона пашыраецца на арганізацыі, якія аказваюць любыя іншыя паслугі па кіраванні крыптаактывамі. Як і раней, захоўваецца выключэнне для грамадзян краін ЕС, Еўрапейскай эканамічнай зоны і Швейцарыі, а таксама для асоб з часовым або пастаянным відам на жыхарства ў гэтых дзяржавах.
У санкцыйныя спісы таксама ўключылі беларускую крыптаплатформу і рэзідэнта ПВТ White Bird.
У спіс тавараў, забароненых для паставак у Беларусь, дададзены некаторыя віды радыёабсталявання, парашкі нікелю, берылію, серварухавікі, сістэмы запуску БПЛА, наземнае дапаможнае абсталяванне для БПЛА і інш.
Таксама пашыраны пералік тавараў, імпарт якіх з Беларусі забаронены. Цяпер ён уключае руды і канцэнтраты каляровых металаў, талевае масла, шклабой, некаторыя вырабы са шкла, шклянога посуду, гадзіннікі, шэраг будаўнічых матэрыялаў, кузаўныя элементы і дэталі аўтатранспартных сродкаў.
Для некаторых тавараў зроблены выключэнні. Да 25 кастрычніка можна завяршаць здзелкі па талеваму маслу, вырабах са шкла і аўтазапчастках у рамках кантрактаў, заключаных да 24 ліпеня гэтага года. Да канца гэтага года Венгрыя захавае магчымасць імпартаваць з Беларусі ацыклічныя насычаныя вуглевадароды.
Адначасова кампетэнтныя органы краін ЕС надзелены правам дазваляць продаж у Беларусь абсталявання для сувязі, вылічальных машын і носьбітаў інфармацыі пры ўмове, што яго выкарыстанне не звязана з ваеннымі мэтамі і ёсць пацвярджэнне прызначэння прадукцыі для грамадзянскіх сетак сувязі, у якіх доля дзяржавы складае не больш за 50%.
