Памежная ахова Польшчы раскрыла маштабную схему фіктыўнага працаўладкавання замежнікаў з мэтай атрымання ўязных віз. Супрацоўнікамі памежнага аддзела ў Лодзі затрыманыя дзве грамадзянкі Польшчы і Украіны, а таксама грамадзянін Беларусі.
Паводле версіі следства, падазраваныя зарэгістравалі на тэрыторыі Польшчы каля 130 юрыдычных асоб, якія фактычна не вялі гаспадарчай дзейнасці. Іх выкарыстоўвалі для атрымання дакументаў, якія давалі замежнікам права на ўезд у Польшчу.
За час дзеяння схемы былі пададзены больш за 11 тыс. заяў аб запрашэнні на працу замежнікаў, якія затым выкарыстоўваліся для атрымання нацыянальных віз.
“Замежнікі, якія выкарыстоўваліся для стварэння кампаній, уязджалі ў Польшчу легальна, у тым ліку для атрымання часовага віду на жыхарства. Яны стваралі давераныя профілі, банкаўскія рахункі і нумары тэлефонаў, выкарыстоўваючы свае дадзеныя, якія затым прадастаўлялі арганізатарам. Пасля завяршэння гэтых дзеянняў яны пакідалі краіну”, — расказалі ў прэс-службе Памежнай аховы Польшчы.
У далейшым на падставе гэтых дадзеных рэгістраваліся юрыдычныя асобы, ад імя якіх ужо падаваліся заявы аб запрашэнні на працу замежнікаў.
Раскрыць схему ўдалося дзякуючы аналізу фінансавых патокаў на банкаўскіх рахунках, якія належалі ўладальнікам кампаній. Двух падазраваных затрымалі на пераходзе Кузніца-Брузгі, трэцяга — у Гданьску.
Затрыманым былі прад’яўлены абвінавачанні ў арганізацыі незаконнага перасячэння мяжы замежнікамі і атрыманні фальшывых дакументаў шляхам увядзення ў зман дзяржаўных службовых асоб. Трое падазраваных арыштаваныя на тры месяцы.
Расследаванне працягваецца, магчымыя далейшыя арышты.
