Гомельскі аблвыканкам адабраў дзяржпакет акцый гандлёвага аб’екта ў інвестара, якому ён быў прададзены 20 гадоў таму. Пра гэта паведамілі ў КДК. Рашэнне прынята па выніках праверкі дзяржкантролю.
Паводле версіі КДК, пакупнік пакета акцый не выканаў пастаўленыя перад ім умовы. Каштоўныя паперы былі прададзеныя з умовай захавання на працягу 10 гадоў (да 2017 года) працоўных месцаў, укладання не пазней за 2010 год інвестыцый у тэхнічнае пераабсталяванне і рэканструкцыю гандлёвага цэнтра, уключаючы надбудову дадатковых паверхаў.
Інвестар умовы ў поўным аб’ёме не выканаў, у прыватнасці, не была праведзена рэканструкцыя падвальных памяшканняў пад гандлёвыя плошчы і надбудова дадатковых паверхаў. Таксама быў скарочаны персанал гандлёвага аб’екта.
“Па матэрыялах праверкі КДК Гомельскім аблвыканкамам прыняты меры па скасаванні ў судовым парадку дагавора куплі-продажу акцый. Дзяржаўны пакет коштам больш за 330 тыс. рублёў вернуты ва ўласнасць Гомельскай вобласці ў поўным аб’ёме”, — падсумавалі ў камітэце.