Генпракуратура накіравала ў Мінгарсуд яшчэ адну справу, звязаную з хабарніцтвам пры арганізацыі канцэртаў. На гэты раз абвінавачваецца дырэктар дома культуры, які пасля ўзначальваў камунальнае прадпрыемства. Яму інкрымінуецца атрыманне хабару, у тым ліку падрыхтоўка да такога злачынства, па ч. 1 арт. 430, ч. 1 арт. 13 і ч. 2 арт. 430, ч. 2 арт. 430 Крымінальнага кодэкса.
“Згодна з матэрыяламі справы абвінавачаны, будучы дырэктарам дома культуры аднаго з прадпрыемстваў, а з 21 лютага 2023 года — дырэктарам камунальнага сэрвіснага ўнітарнага прадпрыемства, з 1 лютага 2022 года па 20 лютага 2024 года неаднаразова атрымліваў ад індывідуальных прадпрымальнікаў хабары за садзейнічанне ў арганізацыі і правядзенні на сцэнічных пляцоўках канцэртаў, спектакляў, іншых тэатральна-відовішчных і выставачных мерапрыемстваў з удзелам прафесійных калектываў, выканаўцаў і аўтараў, якіх прадстаўлялі хабарадаўцы”, — гаворыцца ў паведамленні пракуратуры.
Адзначаецца, што на аргкамітэце аднаго з дзяржаўных органаў абвінавачаны прадстаўляў звесткі аб “дзейнасці канкрэтнага індывідуальнага прадпрымальніка, якая была звязаная з прыцягненнем замежных артыстаў для ўдзелу ў культурна-відовішчных мерапрыемствах”. За гэта, паводле версіі абвінавачання, ён атрымаў 8,9 тыс. рублёў.
У паведамленні таксама гаворыцца, што абвінавачаны “забяспечыў кампенсацыю ў рэспубліканскі бюджэт звыш 34 тыс. рублёў, якія ён атрымаў у сувязі з учыненнем карупцыйных правапарушэнняў. У прыватнасці, увосень 2022 года ён атрымаў не менш за 10 тыс. беларускіх рублёў, увосень 2023 года — не менш за 500 тыс. расійскіх рублёў, а ўвосень 2024 года — яшчэ не менш за 150 тыс. расійскіх рублёў”.
На мінулым тыдні ў суд была накіравана справа ў дачыненні да прадстаўніка абласной філармоніі.
