Святлана Ціханоўская сустрэлася з прэзідэнтам Італіі Серджо Матарэлай. Перамовы ўпершыню прайшлі ў Квірынальскім палацы, гістарычнай рэзідэнцыі кіраўніка дзяржавы.
Як расказалі ў Офісе Ціханоўскай, яна падзякавала прэзідэнту Італіі і італьянскаму народу за нязменную падтрымку беларускага народа і дэмакратычных сіл. Паводле яе слоў, супрацоўніцтва паміж Італіяй і дэмсіламі знаходзіцца на высокім узроўні і развіваецца ва ўрадавым, парламенцкім і муніцыпальным вымярэннях.
Ціханоўская і Матарэла абмеркавалі сітуацыю ў Беларусі, дзе працягваюцца рэпрэсіі, у тым ліку супраць вернікаў.
Ціханоўская падкрэсліла важнасць умацавання еўрапейскай перспектывы для беларускага народа і супрацьдзеяння русіфікацыі і мілітарызацыі Беларусі. Яна адзначыла неабходнасць падтрымкі мабільнасці беларусаў, а таксама беларускай моладзі і грамадства праз адукацыйныя, культурныя і акадэмічныя праграмы. Таксама была падкрэслена важнасць пашырэння магчымасцей для беларускіх студэнтаў і даследчыкаў для ўдзелу ў еўрапейскіх і італьянскіх праграмах, адукацыйных абменах і стыпендыяльных ініцыятывах.
Святлана Ціханоўская расказала італьянскаму прэзідэнту пра супрацоўніцтва ў гуманітарным напрамку з адміністрацыяй прэзідэнта ЗША Дональда Трампа. Паводле яе слоў, дэмакратычныя сілы стварылі інфраструктуру для прыёму палітычных зняволеных і аказання дапамогі рэпрэсаваным. Таксама ішла гаворка пра стратэгію дэмсіл, ініцыятыву “круглага стала”, у якім могуць прыняць удзел прадстаўнікі розных палітычных сіл і грамадскіх арганізацый, для мірнай перадачы ўлады пры ўмове спынення рэпрэсій, вызвалення палітычных зняволеных, адмены пераследу за іх погляды і гарантавання бяспекі ўдзельнікаў. Яна падкрэсліла, што Італія можа адыграць важную ролю ў садзейнічанні такому дыялогу ў будучыні.
