Святлана Ціханоўская звярнулася да беларусаў у сувязі з 15-годдзем выбуху ў мінскім метро, у выніку якога загінулі 15 чалавек і пацярпелі больш за 400.
«Сёння — дзень памяці і болю, які жыве ў нашых сэрцах ужо 15 гадоў», — адзначыла палітык.
“15 чалавек. Звычайных людзей, якія проста ехалі дадому, спяшаліся да сваіх блізкіх, жылі звычайным жыццём, будавалі планы. І чые жыцці былі жорстка абарваны ў адзін момант. Больш за 400 атрымалі раненні. Ніякія словы не здольныя перадаць той жах, які перажылі сотні сем’яў і ўся Беларусь”, – напісала яна.
Ціханоўская нагадала, як у тыя трагічныя дні беларусы не засталіся ўбаку — падвозілі пацярпелых, аказвалі медыцынскую дапамогу, шукалі родных па бальніцах.
«Нават у самыя цяжкія моманты беларусы не засталіся ўбаку — трымаліся разам і дапамагалі адно аднаму», — падкрэсліла яна.
Палітык заявіла, што пасля трагедыі засталіся пытанні, адказаць на якія можа толькі поўнае, незалежнае і празрыстае расследаванне, якому людзі змогуць давяраць.
“Гэта памяць, якая застаецца з намі. Але памяць — гэта і адказнасць. Адказнасць перад тымі, каго ўжо няма, і перад тымі, хто жыве сёння. І таму праўда пра гэтую трагедыю таксама мае значэнне. Калі ў грамадстве праз гады застаюцца пытанні, адказаць на іх можа толькі поўнае, незалежнае і празрыстае расследаванне, якому людзі могуць давяраць. Бяспека людзей — гэта аснова, на якой трымаецца любое грамадства”, – падкрэсліла яна.
Нагадаем, выбух прагрымеў 11 красавіка 2011 года ў 17.55. У выніку тэракту загінулі 15 чалавек і сотні пацярпелі. Вінаватымі былі прызнаны 25-гадовыя ўраджэнцы Віцебска Дзмітрый Канавалаў і Уладзіслаў Кавалёў. Іх прысудзілі да смяротнага пакарання. У сакавіку 2012 года стала вядома, што прысуд прыведзены ў выкананне.
