Фонд BYSOL падвёў папярэднія вынікі 2025 года. За год фонд сабраў больш за 1,25 млн еўра дапамогі. У гэтую суму ўключаны персанальныя зборы, зборы BYSOL і зборы на ініцыятывы.
За год фонд правёў каля 250 персанальных збораў, у тым ліку 12 збораў для беларускіх добраахвотнікаў ва Украіне і два экстраныя зборы для вызваленых палітвязняў (111 тысяч еўра і 260 тысяч еўра).
За год BYSOL зафіксаваў 140 кейсаў эвакуацыі. У некаторых выпадках людзей вывозілі цэлымі сем’ямі.
«Каманда эвакуацыі інтэнсіўна працавала на працягу ўсяго года. На гэта ўплывалі як “справа Гаюна”, так і працяг сістэмных рэпрэсій. І нават пасля вызвалення палітвязняў іх не пакідалі ў спакоі — частка з іх была вымушана ратавацца па-за межамі Беларусі», — адзначае BYSOL.
За год было праведзена амаль 500 выплат былым палітвязням. Сродкі траціліся на набыццё сезоннага адзення, лекаў і іншыя жыццёва неабходныя патрэбы.
10 праектаў ініцыятыў атрымалі міні-гранты на агульную суму амаль 37 тысяч еўра.
На гарачую лінію фонду паступіла больш за 2000 запытаў рознай складанасці.
«Мы хочам, каб і ў 2026 годзе наша салідарнасць біла рэкорды. Падтрымайце каманду BYSOL, каб гэта было магчыма! Дзякуем усім, хто падтрымліваў зборы і нашу працу! А таксама калегам, журналістам, партнёрам і донарам!» — піша BYSOL.
