Сяргей Адзярыха, былы намеснік гендырэктара БелТА па ідэалогіі, выйшаў на волю, паведамляе «Наша Нiва». У 2022 годзе яго прысудзілі да пяці гадоў калоніі за злівы службовай інфармацыі тэлеграм-каналу «Нік і Майк».
Адзярыху затрымалі ў кастрычніку 2021 года. Яго абвінавачвалі ў тым, што ён прадастаўляў тг-каналу «Нік і Майк» закрытую інфармацыю аб працоўным графіку Аляксандра Лукашэнкі. Згодна з матэрыяламі справы, на падставе перададзенай інфармацыі было размешчана не менш за 58 публікацый. У некаторых выпадках публікацыя інфармацыі прывяла да змяненняў у графіку Лукашэнкі.
Дзеянні Адзярыхі расцанілі як перавышэнне службовых паўнамоцтваў (ч. 2 арт. 426 Крымінальнага кодэкса). Абвінавачанне лічыла, што ён падарваў аўтарытэт і дзелавую рэпутацыю БелТА, ствараў у грамадстве меркаванне аб прадажнасці службовых асоб і іх незадаволенасці праведзеным палітычным курсам.
У 2022 годзе Адзярыху прысудзілі да пяці гадоў калоніі і штрафу ў 500 базавых велічынь.
Адзярыха быў прызнаны палітвязнем. Яго тэрмін заканчваўся прыкладна ў ліпені 2026 года, але, як стала вядома «НН», ён ужо знаходзіцца на волі. Магчыма, ён трапіў пад амністыю, бо артыкул быў карупцыйным, а не «пратэсным». У кастрычніку 2025 года чалавек з імем Сяргей Адзярыха адкрыў ІП як таксіст.