Былая палітзняволеная і актывістка Саюза палякаў Беларусі Анжаліка Борыс расказала LRT пра сустрэчу з Анджэем Пачобутам пасля яго вызвалення. Паводле яе слоў, адміністрацыя Аляксандра Лукашэнкі паведаміла ёй, што Пачобут быў памілаваны па яе просьбе і просьбе яго маці.
«Мне паведамілі з адміністрацыі прэзідэнта, што Анджэй быў памілаваны па маёй просьбе і просьбе яго маці. І што ў яго будзе выбар, — сказала яна. – Ён можа з’ехаць у Польшчу, але можа і вярнуцца. Самае галоўнае — ён свабодны і ў яго ёсць пашпарт».
Паводле яе слоў, палякі ў Беларусі гадамі маліліся, пісалі просьбы і чакалі гэтай навіны.
«Для нас вельмі важна, што наш калега Анджэй Пачобут на волі, што ў яго ёсць магчымасць выбару, што ён нічым не абмежаваны», — адзначыла яна.
«Маё першае слова было: дзякуй Богу за ўсё», — кажа яна.
За 5 гадоў зняволення Барыс сустракалася з Пачобутам двойчы. Першая ж сустрэча пасля вызвалення адбылася ў Белавежскай пушчы і працягвалася каля трох гадзін.
«Мы спакойна размаўлялі каля трох гадзін», — расказала яна.
Паводле яе слоў, у размове абмяркоўвалася і дзейнасць Саюза палякаў Беларусі.
«Мы гаварылі пра арганізацыю, пра тое, што яна працягвае працаваць, што дзеці вучаць польскую мову, што мы праводзім мерапрыемствы. Гэта для нас самае важнае», — адзначыла яна.
Паводле яе слоў, у структуру Саюза ўваходзяць каля 20 тысяч чалавек.
«Гэта вялікая структура — каля 20 тысяч чалавек — і фактычна адзіная, якая сёння нармальна функцыянуе ў Беларусі», — кажа яна.
Паводле яе слоў, гэта магчыма дзякуючы згодзе беларускіх уладаў.
«Без гэтага функцыянаванне было б немагчымым», — дадае яна.
Барыс лічыць, што адзіны шлях да паляпшэння сітуацыі — дыялог.
«Саюз палякаў заўсёды выступаў за дыялог і добрыя адносіны. Нам, як польскай меншасці ў Беларусі, асабліва патрэбныя стабільнасць і добрыя адносіны з Польшчай, а таксама адкрыты дыялог, — падкрэсліла яна. – Нават складаны дыялог лепшы за яго адсутнасць. Ён лепшы за вайну».
Нагадаем, 28 красавіка ў пункце пропуску «Перароў – Белавежа» на беларуска-польскай мяжы адбыўся абмен па формуле 5 на 5. З боку Беларусі і Расіі былі вызвалены тры палякі і два малдаваніны. Беларусь перадала Польшчы журналіста Анджэя Пачобута і манаха-кармеліта Гжэгожа Гавела і асуджанага па абвінавачанні ў шпіянажы Томаша Бярозу. Расія выдала Малдове двух супрацоўнікаў малдоўскіх спецслужбаў.
Польшча перадала Расіі археолага Александра Буцягіна, а Беларусі — беларускага шпіёна Уладзіслава Надзейку. Малдова перадала Беларусі экс-супрацоўніка спецслужбаў Аляксандра Балана, Расіі — грамадзянку РФ Ніну Папову.
На мяжы Анджэя Пачобута сустракаў прэм’ер-міністр Польшчы Дональд Туск. Ён напісаў, што першымі словамі былога палітвязня было пытанне пра магчымасць вярнуцца ў Беларусь.
Анжаліка Борыс была затрыманая ў сакавіку 2021 года. У дачыненні да яе ўзбудзілі крымінальную справу па артыкуле 130 КК аб распальванні варожасці. Праз год яна была вызвалена з СІЗА і пераведзена пад хатні арышт у дом яе маці ў Гродне. У красавіку 2023 года СМІ паведамілі, што Анжаліку Борыс разам з маці выклікалі ў Мінск. У беларускай сталіцы ёй уручылі пастанову аб спыненні крымінальнай справы за адсутнасцю складу злачынства. Аляксандр Лукашэнка заяўляў, што нібыта «амніставаў і памілаваў» Борыс.
