14 лютага ў межах Еўрапейскага кінарынку (EFM) на Берлінскім міжнародным кінафестывалі адбудзецца прэзентацыя BIFA Work in Progress. Гэта адмысловы шоўкейс-пітчынг незалежных беларускіх кінапраектаў, якія знаходзяцца ў пошуку міжнародных партнёраў, прадзюсараў і фінансавання.
Пітчынг (ад слова pitch — прасоўваць, выстаўляць пра продаж) — вусная або візуальная прэзентацыя кінапраекта з мэтай знаходжання інвестараў.
Беларуская незалежная кінаакадэмія (BIFA) прадставіць на пітчынгу шэсць праектаў (мастацкіх і дакументальных) кінематаграфістаў з Беларусі.
У выбарку трапілі працы, што адлюстроўваюць розныя бакі беларускага вопыту:
-
«Small Talk» («Свецкая размова») — дакументальнае кіно Сяргея Кавалёва;
-
«Miss of the East» («Міс Усходу») — дакументальны праект мастачкі Яны Шостак;
-
«Redhead Squirrel» («Рудая вавёрка») — ігравая стужка Ульяны Шаргаевай;
-
«Kupala Night» («Купальская ноч») — мастацкі фільм Лізы Чаканавай;
-
«From the Heart to the Sun» («Ад сэрца да сонца») — ігравы праект рэжысёра серыяла “Працэсы” Андрэя Кашперскага.
Яшчэ адзін мастацкі фільм будзе прадстаўлены ў рэжыме ананімнасці — яго аўтары не называюцца публічна з мэтаў бяспекі.
Нагадаем, што першы пітчынг беларускіх праектаў на Еўрапейскім кінарынку, арганізаваны Беларускай незалежнай кінаакадэміяй, адбыўся два гады таму: паслухаць беларускіх фільммейкераў у Gropius Bau сабралася больш за 70 чалавек. Прысутнічалі беларускія кінематаграфісты, еўрапейскія адмыслоўцы і прадстаўнікі кінаіндустрыі. У межах сустрэчы 2024 года Мара Тамковіч, у прыватнасці, паказала эпізод свайго першага поўнаметражнага фільма «Пад шэрым небам», прэм’ера якога адбылася ў чэрвені на нью-ёркскім фестывалі Tribeca.
У межах будучага EFM працягне таксама працу стэнд Беларускай незалежнай кінаакадэміі.
Берлінскі міжнародны кінафестываль пройдзе з 12 па 22 лютага. Еўрапейскі кінарынак у межах кінаагляду будзе працаваць з 12 па 18 лютага.
Падпісвайцеся на культурныя навіны Reform.news у Telegram
