З беларускага боку паступаў сігнал пра жаданне забраць Іну Кардаш, якая была ў студзені гэтага года затрыманая ва Украіне па падазрэнні ў шпіянажы. Аднак практычных крокаў у гэтым напрамку пакуль няма. Пра гэта ў інтэрв’ю “Укрінформ” паведаміў кіраўнік сакратарыята Каардынацыйнага штаба па пытаннях абыходжання з ваеннапалоннымі Багдан Ахрыменка.
“Такі сігнал быў, але, акрамя размоў, пакуль нічога няма. Мы адкрытыя да прапаноў. Нам нецікава трымаць у сябе злачынцаў-замежнікаў, траціць на іх бюджэтныя сродкі ў той час, калі нашы незаконна асуджаныя грамадзяне знаходзяцца за кратамі ў бесчалавечных умовах. Калі ў камунікацыі будуць практычныя прапановы, мы будзем іх разглядаць”, – сказаў ён.
Ахрыменка таксама распавёў пра абставіны затрымання Кардаш.
“СБУ і ГУР атрымалі інфармацыю пра яе дзейнасць і пачалі аператыўную гульню. Яна думала, што працуе ў Каардштабе. Для яе было арганізавана псеўдапрацоўнае месца, яна не мела доступу ў памяшканні Каардынацыйнага штаба, знаходзілася ў іншым месцы. Само памяшканне было падрыхтавана для фіксацыі ўсяго, што адбываецца, а матэрыялы, якія ёй прадастаўлялі, не ўтрымлівалі ніякай праўдзівай інфармацыі. Калі супрацоўнікі СБУ, прыцягнутыя да яе суправаджэння, усё зафіксавалі, было арганізавана яе затрыманне”, – дадаў ён.
Паводле яго слоў, украінскі бок таксама працягвае весці дыялог з Мінскам пра вызваленне ўтрыманых у Беларусі ўкраінцаў.
“Нашы людзі ў Беларусі яшчэ ёсць. Мы ведаем і памятаем пра кожнага з іх. Перамовы вядуцца. Зносіны з беларускім бокам былі заўсёды. У Беларусі працуе наш консул, і ўкраінскія грамадзяне могуць атрымліваць консульскія паслугі. Але мы разумеем, што Беларусь – гэта, па сутнасці, акупаваная тэрыторыя Расійскай Федэрацыі.
Кейс па Беларусі быў дастаткова цікавы тым, што калі расіяне ў лістападзе мінулага года спынілі ўдзел у перамовах, мы паказалі, што гатовыя да камунікацыі па вяртанні нашых грамадзян і беларускіх палітвязняў. Перамовы праходзілі пры ўдзеле ЗША, і мы ўдзячныя спецпрадстаўніку прэзідэнта Трампа за дыялог”, – сказаў ён.
Пры гэтым РФ не ўтрымлівае ў Беларусі ўкраінскіх палонных.
“Гэтага пакуль не фіксуем. Расія выкарыстоўвае беларускія турмы пры падрыхтоўцы да абменаў для перамяшчэння з далёкіх рэгіёнаў Расіі і падвозу палонных да месца правядзення абмену”, – сказаў ён.
