Беларускія прамысловыя прадпрыемствы могуць удзельнічаць у расійскіх праграмах нароўні з арганізацыямі з РФ. Пра гэта пасля дакладу Аляксандру Лукашэнку паведаміў пасол у РФ Аляксандр Рагожнік.
“Мы ў мінулым годзе вырашылі самую галоўную праблему — доступ нашай прамысловасці да ўсіх праграм, якія рэалізуюцца ў Расіі. І сёння на расійскім рынку беларускае роўнае расійскаму. Мы сёння канкурыруем у звычайных эканамічных умовах, і перамагае наймацнейшы”, — сказаў ён, перадае БелТА.
Паводле яго слоў, абарот узаемнага гандлю таварамі з РФ па выніках 11 месяцаў склаў 49,2 млрд долараў, павялічыўшыся на 2,3%. Беларускі экспарт вырас на 2,3% і склаў амаль 25 млрд долараў. Аснову айчынных паставак на расійскі рынак склалі сыры і тварог, сметанковае масла, легкавыя і грузавыя аўтамабілі, нафтапрадукты, часткі і прыналежнасці для аўтамабіляў і трактароў.
“Ніхто яшчэ ў пачатку — сярэдзіне года не чакаў, што мы зможам у значнай ступені вырашыць той клубок праблем, які ў нас быў, і выйсці фактычна на рэкордны паказчык экспарту не толькі тавараў, але і паслуг”, — сказаў ён.
Пры гэтым ён прызнаў, што машынабудаванне спрацавала горш, чым у папярэднія гады.
“Але калі ў цэлым ацэньваць вынікі за апошнія 4 гады, то прырост і па гэтым напрамку, безумоўна, прысутнічае. Нягледзячы на астуджэнне расійскай эканомікі, мы не дапусцілі сур’ёзнага спаду ў сваіх экспартных пастаўках. Робячы акцэнт на супрацоўніцтва з рэгіёнамі, усё ж захавалі такі фундамент у працы і ў гэтай галіне”, — патлумачыў пасол.
Ён таксама распавёў пра планы ў галіне авіябудавання.
“Дамовіліся аб тым, што будзе фарміравацца абноўленая праграма ў галіне авіябудавання, якая задзейнічае наш прамысловы сектар, да 2035 года.
Мы дамовіліся аб стварэнні адзінай інфармацыйнай сістэмы, якая будзе забяспечваць кантроль за ліквідацыяй і стварэннем дублюючых вытворчасцяў з тым, каб мы развіваліся і дапаўнялі адно аднаго, не канкурыруючы ў пэўным сектары”, — сказаў Рагожнік.