У Кіеве прайшла прэс-канферэнцыя з удзелам былых палітвязняў, якіх пасля перамоваў з ЗША вывезлі з Беларусі ва Украіну. У ёй узялі ўдзел Віктар Бабарыка, Марыя Калеснікава, Аляксандр Фядута і Уладзімір Лабковіч.
Адказваючы на пытанне пра вайну і ролю Беларусі ў ёй, Віктар Бабарыка заявіў, што падчас зняволення ён і іншыя палітвязні не мелі доступу да дакладнай інфармацыі і таму не могуць даваць ацэнак таму, што адбываецца.
“Мы нічога не ведаем дакладна. Чаму? Таму што ў тых умовах, у якіх мы знаходзіліся, доступ да інфармацыі быў вельмі-вельмі абмежаваны. Я не кажу — праўдзіва ці непраўдзіва — толькі аднабакова, гэта значыць выключна з боку беларускіх СМІ. Таму каментаваць, даваць ацэнку, калі ты ведаеш пазіцыю толькі аднаго боку, бессэнсоўна. Таму ўсё, што тычыцца таго, што адбываецца ў знешнім свеце, асабліва там, дзе пытанне датычыцца нейкіх спрэчных момантаў, у якіх прысутнічае больш чым адзін бок, я думаю, ад нас вы мала чаго атрымаеце”, — адказаў ён.
Па словах Марыі Калеснікавай, палітвязні «практычна наогул нічога не ведалі» пра вайну.
“Таму што не было магчымасці атрымаць хоць якую-небудзь нават мінімальную інфармацыю пра гэта. І сапраўды я не магу даць ніякіх каментароў на гэты конт”, — сказала яна.
“Я вельмі хачу, каб гэта спынілася. І я ведаю, што мільёны людзей па ўсёй зямлі таксама хочуць, каб гэты жах спыніўся. Каб спыніліся забойствы людзей, каб спыніліся такія бесчалавечныя ўчынкі, каб людзі ўспомнілі, што яны людзі і навошта мы ўсе прыйшлі ў гэты свет. Вельмі цяжка пра гэта чуць, і тут ніякіх апраўданняў быць не можа. Я спачуваю і глыбока падзяляю страты Украіны, страты Расіі і ўсіх, хто пакутуе”, — дадала яна.
Бабарыка падкрэсліў, што пытанне павінна ставіцца не пра нацыянальнасць ці палітычны бок канфлікту, а пра чалавечыя каштоўнасці.
“З майго пункту гледжання, вы вельмі правільна паставілі пытанні: ці падтрымліваем мы людзей. Пытанне не датычыцца нацыянальнасці, не датычыцца праваты ці неправаты і ўсяго астатняга. Усё, што здзяйсняецца супраць чалавечнасці, — гэта бесчалавечна, і гэта нельга падтрымліваць. Але яшчэ раз падкрэслю: такія дзеянні не могуць падтрымлівацца і не залежаць ад таго, дзе чалавек нарадзіўся.
Яны залежаць ад маральных прынцыпаў самога чалавека. І іх нельга падтрымліваць ні ў якім разе. Нельга апраўдваць, што гэта можна рабіць, таму што я за справядлівасць. Не, гэтага рабіць нельга. То-бок можа быць тлумачэнне, чаму ты гэта робіш, але ацэнка самога маральнага ўчынку ад гэтага змяняцца не можа.
І таму адказ на ваша пытанне ўтрымліваецца ў самім пытанні: такіх людзей нельга падтрымліваць. Але гэта не значыць, што гэта здзяйсняюць выключна… расіяне кажуць, што гэта ўкраінцы робяць, украінцы — што гэта расіяне або нехта яшчэ. Сапраўды так, як і ў любой вайне, якая б ні адбывалася, здзяйсняюцца злачынныя дзеянні, якія нельга падтрымліваць ні ў якой меры”, — сказаў ён.
“Усе ваенныя злачынствы павінны быць расследаваныя, вінаватыя — пакараныя”, — заявіў Уладзімір Лабковіч.
