Каля 350 чалавек затрымалі пад Расонамі — праваабаронцы

Рэдакцыя Reform.news · 30 ліпеня 2026, 17:41

https://reform.news/be/kalja-350-chalavek-zatrymali-pad-rasonami-pravaabaroncy/

Каля 350 чалавек былі затрыманыя пад Расонамі 29 ліпеня, паведамляе “Віцебская вясна”. Паводле папярэдняй інфармацыі, гаворка ідзе пра ўдзельнікаў штогадовага злёту Rainbow Family, які аб’ядноўвае прыхільнікаў ідэі гарманічнага суіснавання з прыродай, альтэрнатыўнага ладу жыцця і пратэсту супраць умоўнасцяў капіталістычнага грамадства.

Сустрэчы Rainbow Family звычайна праходзяць у маланаселеных месцах на прыродзе. Удзельнікі ўсталёўваюць намётавыя лагеры каля вадаёмаў і праводзяць час разам.

Паводле інфармацыі праваабаронцаў, людзей затрымлівалі цэлымі сем’ямі. Сярод затрыманых былі дзеці, некалькі непаўналетніх правялі ноч разам з дарослымі ў ізалятары часовага ўтрымання.

На затрыманых склалі пратаколы за ўдзел у несанкцыянаваным масавым мерапрыемстве. Ім паведамілі, што на працягу двух месяцаў павінны адбыцца судовыя разгляды.

Інфармацыя пра тое, што адбылося, удакладняецца.