Суд Ленінскага раёна Брэста прызнаў вінаватым у махлярстве ў асабліва буйным памеры 29-гадовага берасцейца.
Як распавялі ў пракуратуры, мужчына быў кіраўніком юрыдычнай асобы. Ён заключаў дамовы з фізічнымі асобамі, у асноўным жыхарамі сельскіх населеных пунктаў Брэсцкай і Гродзенскай абласцей, якія з’яўляліся пенсіянерамі і пажылымі людзьмі. Яго фірма прымала заказы на выраб вокнаў і дзвярэй. Аднак заказы не выконвала. У кампаніі не было ні вытворчага абсталявання, ні памяшканняў.
Схема дзейнічала на працягу некалькіх гадоў. Усяго ён завалодаў грашыма 138 пацярпелых на суму больш за 429 тыс. рублёў. У асобных выпадках гэтыя сродкі былі крэдытнымі.
Даведаўшыся, што пацярпелыя пачалі звяртацца ў міліцыю, мужчына схаваўся ў РФ. Аднак там ён быў затрыманы і экстрадаваны ў Беларусь.
Суд прызначыў яму пакаранне ў выглядзе пазбаўлення волі на тэрмін 7 гадоў са штрафам у памеры 250 базавых велічынь. З мужчыны таксама спагнаны на карысць пацярпелых прычынены маёмасны ўрон, а таксама грашовыя кампенсацыі маральнай шкоды.
Прысуд у законную сілу не ўступіў, можа быць абскарджаны або апратэставаны ў апеляцыйным парадку.