ЗША пачалі расследаванне інцыдэнту з кацерам ля берагоў Кубы. Пра гэта заявіў дзяржсакратар ЗША Марка Рубіа.
Міністэрства ўнутраных спраў Кубы паведаміла, што кацер з флорыдскім рэгістрацыйным нумарам FL7726SH быў выяўлены пагранічнікамі ў сераду раніцай. Калі яны наблізіліся да яго для ідэнтыфікацыі, людзі, якія знаходзіліся на кацеры пад амерыканскім сцягам, адкрылі агонь. Быў паранены камандзір пагранічнага нарада. У МУС Кубы заявілі, што ў выніку стральбы чатыры чалавекі на амерыканскім кацеры былі забітыя, шасцёра параненыя. Параненым была аказана медыцынская дапамога.
Паводле слоў Рубіа, амерыканскі бок атрымаў інфармацыю пра інцыдэнт ад кубінскіх уладаў. Было пачата расследаванне.
“На дадзены момант у ім удзельнічаюць Міністэрства ўнутранай бяспекі, Берагавая ахова і іншыя ведамствы. Большая частка наяўнай у нас інфармацыі прадастаўлена як кубінскімі ўладамі грамадскасці, так і ўраду ЗША. Наша пасольства ў Гаване працуе над гэтым проста цяпер, запытваючы доступ да людзей, якія знаходзіліся на борце гэтых суднаў, каб высветліць, ці былі яны грамадзянамі ЗША або пастаяннымі жыхарамі. Паводле даных кубінскага рэжыму, судна было зарэгістравана ў Флорыдзе. Мы спрабуем гэта ўстанавіць.
Неўзабаве мы ўсё даведаемся. Мы хутка даведаемся значна больш фактаў пра гэты інцыдэнт, чым ведаем цяпер. Большая частка інфармацыі, якая публікуецца, атрымана ад кубінцаў. Мы праверым яе незалежна. Па меры збору дадатковай інфармацыі мы будзем гатовыя адрэагаваць адпаведным чынам. Я не збіраюся будаваць здагадкі. Я не збіраюся выказваць сваё меркаванне пра тое, чаго я яшчэ не ведаю. Але мы высветлім, што менавіта тут адбылося, і затым адрэагуем адпаведным чынам”, – сказаў Рубіа.
Дзяржсакратар адмоўна адказаў на пытанне, ці былі на катары ўрадавыя супрацоўнікі і ці была гэта аперацыя ЗША.
Дапоўнена:
МУС Кубы паведаміла, што дзесяць чалавек на катары спрабавалі пранікнуць на востраў “з тэрарыстычнымі мэтамі”.
«Усе ўдзельнікі — кубінцы, якія пражываюць у ЗША. У большасці з іх маецца вядомая крымінальная і гвалтоўная дзейнасць», — гаворыцца ў паведамленні.
Паведамляецца, што канфіскаваны штурмавыя вінтоўкі, кароткаствольная зброя, самаробныя выбуховыя прылады (кактэйлі Молатава), бронекамізэлькі, аптычныя прыцэлы і камуфляжная форма.
На Кубе таксама затрымалі Дуніэля Эрнандэса Сантаса, якога накіравалі з ЗША, каб той прыняў узброеную групу. Мужчына прызнаў датычнасць.
