Украіна рыхтуе адказ на планы Расіі па наступе на Чарнігаўска-Кіеўскім напрамку. МЗС Украіны даручана падрыхтаваць меры ў дачыненні да Беларусі, калі яна будзе выкарыстана Расіяй для пашырэння вайны.
Прэзідэнт Украіны Уладзімір Зяленскі даручыў павялічыць сілы УСУ на Чарнігаўска-Кіеўскім напрамку.
«Дэталёва прааналізавалі наяўныя даныя нашых разведак аб расійскім планаванні наступальных аперацый на Чарнігаўска-Кіеўскім напрамку. Па кожным магчымым варыянце дзеянняў ворага рыхтуем адказы, калі расіяне сапраўды вырашацца пашырыць сваю агрэсію. Нашы сілы на гэтым напрамку будуць павялічаныя», — заявіў Зяленскі пасля правядзення стаўкі 20 мая.
МЗС Украіны атрымала заданне падрыхтаваць меры ў дачыненні да Беларусі, а ўкраінскія разведслужбы атрымалі адпаведныя «непублічныя задачы».
«Пераглядаем і магчымасці нашай знешняй актыўнасці. Даручыў МЗС Украіны падрыхтаваць дадатковыя меры дыпламатычнага ўздзеяння ў дачыненні да Беларусі, якая можа быць выкарыстана Расіяй для такога пашырэння вайны. Адпаведныя непублічныя задачы ёсць і ў ўкраінскіх разведвальных службаў», — сказаў Зяленскі.
Украіна таксама атрымала інфармацыю пра планы Расіі мабілізаваць 100 тысяч чалавек. Кіеў лічыць, што схаваную мабілізацыю правесці не атрымаецца, таму чакаюцца «расійскія палітычныя рашэнні іншага фармату, у прыватнасці такія, як нядаўнія рашэнні па Прыднястроўскім рэгіёне Малдовы».
Раней Зяленскі заяўляў пра актыўныя перамовы Расіі з Аляксандрам Лукашэнкам з мэтай глыбей уцягнуць Беларусь у вайну. Паводле інфармацыі Украіны, Расія разглядае планы аперацый з тэрыторыі Беларусі супраць Украіны або адной з краін NATO. Галоўнакамандуючы УСУ Аляксандр Сырскі назваў пагрозу наступу з тэрыторыі Беларусі рэальнай.
