У Гомельскай вобласці ўрокі ў школах 12 студзеня пройдуць у штатным рэжыме, нягледзячы на паніжэнне тэмпературы паветра. Адмене падлягаюць толькі заняткі на адкрытым паветры — урокі фізічнай культуры і мерапрыемствы шостага школьнага дня. Пра гэта паведаміў начальнік галоўнага ўпраўлення адукацыі Гомельскага аблвыканкама Руслан Смірноў.
Паводле яго слоў, у раёнах вобласці створаны штабы для працы ў складаных пагодных умовах. Тэрыторыі ўстаноў адукацыі расчышчаныя ад снегу, апрацаваныя супрацьгалалёднымі сумесямі, забяспечаны доступ да харчблокаў.
«Тэмпературны рэжым дазваляе праводзіць навучальны працэс», — адзначыў чыноўнік.
Ён нагадаў, што парадак працы школ і дзіцячых садоў пры нізкіх тэмпературах рэгулюецца санітарна-эпідэміялагічнымі нормамі. У прыватнасці, мясцовыя органы ўлады могуць абмяжоўваць знаходжанне дзяцей ва ўстановах адукацыі пры тэмпературы −25 °С і ніжэй пры хуткасці ветру ад 3 м/с. Прагулкі для дзяцей да трох гадоў абмяжоўваюцца пры −15 °С, для дашкольнікаў ад трох да сямі гадоў — пры −18 °С, для школьнікаў — пры −22 °С.
Дарожныя службы праверылі маршруты школьных аўтобусаў, пад’ездныя шляхі да ўстаноў адукацыі расчыщаныя. Падстаў для адмены заняткаў, паводле даных абласных уладаў, няма.
«На кожным маршруце школьных аўтобусаў павінен дзяжурыць педагог, які ў выпадку моцных маразоў упэўніцца, што дзеці дайшлі да дому і застаюцца пад наглядам», – паставіў задачу старшыня аблвыканкама Іван Крупко, пад кіраўніцтвам якога сёння ў Гомелі адбылося пасяджэнне штаба па ліквідацыі наступстваў непагадзі ў рэгіёне.
Паводле яго слоў, раёнам, дзе прайшоў ледзяны дождж, неабходна адсочваць стан дахаў будынкаў, каб своечасова ачысціць іх ад снегу, які стаў цяжкім.
За апошнія суткі экстраных сітуацый не зафіксавана, паведамілі ў аблвыканкаме. Неспрыяльных і небяспечных пагодных з’яў не назіралася. Прагноз нізкіх тэмператур на панядзелак захоўваецца, сёння метэаролагі абяцаюць тэмпературу па вобласці ў межах −10… −12 °С і невялікі снег.
Дзяжурныя службы працуюць у штатным рэжыме, працягваецца расчыстка вулічна-дарожнай сеткі, на дадзеных відах работ задзейнічана 965 адзінак спецыяльнай тэхнікі, у тым ліку больш за 300 прыцягнутых машын. Праваахоўнікі кантралююць абстаноўку і якасць расчысткі дарожнага палатна.
Праблем на магістралях не назіраецца, слізкія ўчасткі апрацоўваюць супрацьгалалёднай сумессю. Дарожныя службы займаюцца скідваннем валоў снегу, пашырэннем праезнай часткі, расчысткай пад’ездаў да сельскіх населеных пунктаў.
Учора ўсе рэйсавыя аўтобусы, аўталаўкі і пошта даехалі да грамадзян. Адзінокія і адзінока пражываючыя атрымалі ўсю неабходную дапамогу.
Праца экстраных і дарожных службаў працягваецца. За мінулыя суткі ратавальнікі тройчы выязджалі на буксіроўку затрыманай тэхнікі. У выпадку неабходнасці на трасах могуць быць разгорнуты пункты абагрэву.
Нагадаем, 10 студзеня заняткі ў школах Гомельскай вобласці былі адмененыя з-за надвор’я.
