Кіраўніца Аб’яднанага пераходнага кабінета Беларусі Святлана Ціханоўская сустрэлася ў Бруселі з віцэ-прэзідэнтам Еўракамісіі Рафаэле Фіта, які адказвае за рэформы і згуртаванасць.
Фіта адзначыў, што раней паміж ЕС і Беларуссю існавала актыўнае супрацоўніцтва, аднак яно было прыпынена з-за дзеянняў рэжыму, рэпрэсій і ўдзелу ў вайне. Паводле яго слоў, як толькі ў Беларусі адбудуцца дэмакратычныя перамены, беларускія органы ўлады, інстытуты і мясцовыя ўлады змогуць атрымаць доступ да фінансавання ЕС — гаворка ідзе пра сотні мільёнаў еўра.
Ціханоўская падкрэсліла, што рыхтавацца да «паслялукашэнкаўскай» Беларусі неабходна ўжо цяпер, і прапанавала Еўракамісіі загадзя пачаць прапрацоўку магчымых напрамкаў і праектаў супрацоўніцтва. Яна таксама нагадала пра ўсёабдымны план ЕС, агучаны старшынёй Еўракамісіі Урсулай фон дэр Ляен, які прадугледжвае да трох мільярдаў еўра на эканамічныя рэформы ў Беларусі пасля дэмакратычных перамен, паведамілі ў Офісе беларускага палітыка.
“Святлана Ціханоўская, лідар беларускай дэмакратычнай апазіцыі ў выгнанні, і Уладзімір Боля, намеснік прэм’ер-міністра і міністр інфраструктуры і рэгіянальнага развіцця Рэспублікі Малдова. Магчымасць для дыялогу пра згуртаванасць і канкурэнтаздольнасць”, — напісаў Фіта ў X па выніках сустрэчы.
