Украіна ліквідавала сетку сувязі, якая выкарыстоўвалася для кіравання расійскімі дронамі-камікадзэ «Шахед», што заляталі на поўнач краіны з напрамку Беларусі. Пра гэта паведаміў міністр абароны Украіны Міхаіл Фёдараў на сустрэчы з журналістамі, піша «Украінская праўда».
“Нам удалося ліквідаваць Mesh-сетку, якую выкарыстоўвалі “Шахеды” на поўначы, што станоўча паўплывала на абароназдольнасць Кіева і цэнтральнай часткі Украіны”, — заявіў ён, не ўдакладніўшы, якім чынам была знішчана сістэма і як менавіта яна была арганізавана.
Саветнік міністра абароны Украіны Сяргей Бяскрэстнаў растлумачыў выданню, што Mesh-сетка ўладкавана такім чынам, што ўсе яе ўдзельнікі адначасова з’яўляюцца рэтранслятарамі сігналу адзін для аднаго. Паводле яго слоў, сетка, у якой адначасова працуюць шмат «Шахедаў», павінна быць злучана з пунктамі кіравання і расійскімі аператарамі.
“І такія пункты кіравання ёсць на тэрыторыі Расіі і былі на тэрыторыі Беларусі. Як гэта выглядае? Гэта звычайная вежа мабільнага аператара, або нейкая іншая, вышынёй 70–80 метраў, на якой стаяць магутныя антэны, накіраваныя ў бок Украіны. То-бок гэта такія вузлавыя пункты, праз якія інфармацыя ад “Шахедаў” паступае ў пункт кіравання”, — распавёў ён.
Нагадаем, прэзідэнт Украіны Уладзімір Зяленскі 18 лютага ўвёў санкцыі ў дачыненні да Аляксандра Лукашэнкі. Санкцыі ўведзены, у тым ліку, за разгортванне ў Беларусі сістэмы рэтранслятараў для кіравання ўдарнымі дронамі і прадугледжваюць пазбаўленне Лукашэнкі дзяржаўных узнагарод Украіны, блакіроўку актываў, абмежаванне гандлёвых аперацый, абмежаванне транзіту, забарону на ўдзел у прыватызацыі і інш.
Пра тое, што абсталяванне для навядзення дронаў па мэтах ва Украіне размяшчаецца ў тым ліку на тэрыторыі Беларусі, украінскі лідар публічна заявіў у канцы снежня мінулага года.
«Паводле дадзеных нашай разведкі, абсталяванне, якое выкарыстоўваецца для ўдараў па Украіне, у населеных пунктах Беларусі паблізу мяжы размяшчаецца ў тым ліку на жылых дамах. Фактычна на дахах звычайных пяціпавярховак устаноўлены антэны і іншае абсталяванне, якое дапамагае наводзіць «шахеды» на аб’екты ў нашых заходніх рэгіёнах», — сказаў Зяленскі.
