Узброенае сутыкненне адбылося на мяжы Таджыкістана і Афганістана. Пра гэта гаворыцца ў паведамленні Памежных войскаў Дзяржаўнага камітэта нацыянальнай бяспекі Таджыкістана, распаўсюджаным агенцтвам «Ховар» сёння раніцай.
Паводле інфармацыі памежных войскаў, 23 снежня ў 23:30 «трое членаў тэрарыстычнай арганізацыі» перасеклі мяжу ў раёне Кавок Шахінскага раёна. Памежнікі пачалі пошукавыя мерапрыемствы. 24 снежня ў 11:15 было ўстаноўлена, дзе знаходзяцца парушальнікі. Яны адмовіліся падпарадкавацца патрабаванням памежнікаў і аказалі ўзброены супраціў.
«У выніку баявой аперацыі ўсе трое тэрарыстаў былі нейтралізаваныя. На месцы здарэння былі канфіскаваныя 3 вінтоўкі М-16, аўтамат Калашнікава, 3 пісталеты замежнай вытворчасці з глушыцелямі, 10 ручных гранат, прыцэл начнога бачання, выбухоўка і іншыя боепрыпасы», — гаворыцца ў паведамленні.
З таджыкскага боку загінулі двое вайскоўцаў.
Адзначаецца, што гэта ўжо трэці выпадак парушэння мяжы і ўзброенага нападу на мяжы з Афганістанам за апошні месяц.
«Гэтыя факты даказваюць, што ўрад талібаў дэманструе сур’ёзную і неаднаразовую безадказнасць і невыкананне сваіх міжнародных абавязацельстваў і нязменных абяцанняў па захаванні бяспекі і стабільнасці на дзяржаўнай мяжы з Рэспублікай Таджыкістан і барацьбе з членамі тэрарыстычных арганізацый.
Памежныя войскі Дзяржаўнага камітэта нацыянальнай бяспекі Рэспублікі Таджыкістан спадзяюцца, што кіраўніцтва ўрада «Талібана» прынясе прабачэнні народу Таджыкістана і прыме дадатковыя эфектыўныя меры для захавання бяспекі на мяжы з Таджыкістанам», — гаворыцца ў заяве.
