Урад плануе выдзеліць на дарогі 18,88 млрд рублёў у 2026–2030 гадах. Сёння на Нацыянальным прававым інтэрнэт-партале апублікавана пастанова Савета міністраў №776 ад 29 снежня, якой зацверджана дзяржпраграма «Дарогі Беларусі» на 2026–2030 гады.
У тэксце праграмы адзначаецца, што працягласць сеткі аўтадарог агульнага карыстання ў краіне складае 86 538 км, у тым ліку рэспубліканскіх дарог — 15 944 кіламетры, а мясцовых — 70 594 кіламетры. Таксама ў краіне налічваецца 5204 масты. У 2021–2025 гадах было адрамантавана, узведзена і рэканструявана 18 тыс. км аўтамабільных дарог.
У межах новай праграмы плануецца, што будзе адрамантавана, узведзена і рэканструявана не менш як 25 тыс. км аўтадарог агульнага карыстання, забяспечана сувязь раённых цэнтраў з аграгарадкамі дарогамі з удасканаленым пакрыццём працягласцю 47,9 км.
На фінансаванне праграмы выдзяляецца 18,88 млрд рублёў, з якіх 16,7 млрд рублёў складуць сродкі рэспубліканскага бюджэту, а 2,04 млрд рублёў — мясцовых бюджэтаў.
Дзяржпраграма ўключае дзве падпраграмы, якія датычацца рэспубліканскіх і мясцовых аўтадарог.
Урад плануе, што ў новай пяцігодцы будуць рэканструяваны наступныя ўчасткі дарог:
- М-3 Мінск — Віцебск на ўчастку Плешчаніцы — Бярэзінскі запаведнік,
- М-10 мяжа Расійскай Федэрацыі (Селішча) — Гомель — Кобрын на ўчастку Рэчыца — Глінная Слабада,
- Р-46 Лепель — Полацк — мяжа Расійскай Федэрацыі (Юхавічы) на ўчастку Сарочына — Лепель,
- Р-122 Магілёў — Чэрыкаў — Касцюковічы на ўчастку Магілёў — Чавусы,
- М-11/П 2 пад’езд да г. Ліды ад аўтамабільнай дарогі М-11/Е 85 (км 39,598)
- выхады з Мінска і Брэста, у тым ліку дарогі Р-28 Мінск — Маладзечна — Нарач у раёне гісторыка-культурнага комплексу «Лінія Сталіна», Р-53 Слабада — Навасады на ўчастку Жодзіна — Барысаў, Р-83 Брэст — Камянец — Нацыянальны парк «Белавежская пушча» з уладкаваннем кальцавога скрыжавання з М-1/Е 30.
Таксама плануецца ўзвядзенне і рэканструкцыя 18 мастоў і пуцеправодаў.
Праграма прадугледжвае і далейшае развіццё інтэлектуальнай транспартнай сістэмы, а таксама сістэмы дынамічнага ўзважвання ў рэжыме аўтаматычнай фіксацыі парушэнняў.
У дакуменце таксама гаворыцца, што ў 2026–2030 гадах чакаецца паступленне ў рэспубліканскі бюджэт 2,53 млрд рублёў ад спагнання платы за праезд па платных дарогах. Гэтыя сродкі пойдуць на ўтрыманне, рамонт, рэканструкцыю і ўзвядзенне рэспубліканскіх аўтамабільных дарог.