У Вільні 21–22 мая адбудзецца Трэці кангрэс па палітычных зняволеных Беларусі #WithoutJustCause. Пра гэта паведаміў галоўны дарадца Святланы Ціханоўскай Франак Вячорка.
Мерапрыемства пачнецца 19 мая ў Познані з мерапрыемства, прысвечанага рэпрэсаванай моладзі, і працягнецца 21 мая ў Вільні. Паводле слоў Вячоркі, асаблівасць форуму ў тым, што галоўнае слова на ім будзе за самімі палітвязнямі.
«Мы гаворым не толькі пра іх, але і з імі: пра іх думкі, чаканні, патрэбы, іх бачанне будучыні», — адзначыў дарадца.
Ён падкрэсліў важнасць падтрымання тэмы палітвязняў у публічным дыскурсе, паколькі, нягледзячы на працяг вызвалення часткі вязняў, за кратамі застаюцца сотні людзей і з’яўляюцца новыя палітвязні.
На кангрэсе збяруцца праваабаронцы, палітыкі, дыпламаты, прадстаўнікі беларускай грамадзянскай супольнасці і дыяспары. Удзел возьме таксама кіраўніца Аб’яднанага пераходнага кабінета Святлана Ціханоўская.
Прамой трансляцыі не будзе. Для ўдзелу неабходная папярэдняя рэгістрацыя.
Праграма Кангрэса даступная па спасылцы.
