Генеральны дырэктар «Расатама» Аляксей Ліхачоў заявіў пра гібель галоўнага інжынера акупаванай Расіяй Запарожскай АЭС, калабаранта Аляксандра Якаўлева і кіроўцы Дзмітрыя Філіпава. Паводле яго сцвярджэння, гэта адбылося сёння ўдзень у выніку ўдару беспілотніка.
«Дрон УСУ нанёс удар па службовым аўтамабілі Запарожскай АЭС Toyota Camry на мяжы прамысловай пляцоўкі станцыі і г. Энергадар. Разам з галоўным інжынерам Аляксандрам Якаўлевым загінуў кіроўца аўтамабіля Дзмітрый Філіпаў», — напісаў ён.
«Палітычнае кіраўніцтва краіны праінфармавана», — дадаў Ліхачоў.
Паводле яго слоў, «Расатам» чакае ад МАГАТЭ «аператыўнай, канкрэтнай і выразнай рэакцыі».
Паводле базы ўкраінскага «Міратворца», Якаўлеву было 46 гадоў, ён скончыў Адэскі політэхнічны ўніверсітэт. Да акупацыі быў супрацоўнікам Запарожскай АЭС. Падпісаў кантракт з «Расатамам» і атрымаў пашпарт грамадзяніна РФ.
