Савет міністраў пастановай №362 ад 10 ліпеня ўнёс карэктывы ў праграму развіцця Прыпяцкага Палесся на 2025–2030 гады. Дакумент сёння апублікаваны на Нацыянальным прававым інтэрнэт-партале.
У праграму дададзены шырокі спіс службовых асоб, якія нясуць персанальную адказнасць за эфектыўную рэалізацыю мер па развіцці раёнаў Прыпяцкага Палесся. У яго ўключаны:
- намеснікі прэм’ер-міністра па курыруемых імі напрамках,
- міністры антыманапольнага рэгулявання і гандлю, архітэктуры і будаўніцтва, жыллёва-камунальнай гаспадаркі, аховы здароўя, лясной гаспадаркі, адукацыі, культуры, прамысловасці, сувязі і інфарматызацыі, сельскай гаспадаркі і харчавання, спорту, транспарту і камунікацый, працы і сацыяльнай абароны, энергетыкі,
- старшыня Дзяржкаммаёмасці,
- старшыні «Белдзяржхарчпрама» і «Белнафтахіма»,
- старшыні Брэсцкага і Гомельскага аблвыканкамаў,
- старшыні Ганцавіцкага, Ельскага, Жыткавіцкага, Калінкавіцкага, Лельчыцкага, Лунінецкага, Петрыкаўскага, Пінскага і Столінскага райвыканкамаў,
- старшыня «Белкаапсаюза»,
- старшыня праўлення «Белаграпрамбанка»,
- дырэктар дзяржаўнай установы «Нацыянальнае агенцтва па турызме».
Цікава, што першапачаткова пастанова аб праграме не ўключала пункт аб персанальнай адказнасці, што з’яўляецца даволі рэдкім выпадкам для беларускай практыкі.
Адначасова ўрад скарэктаваў аб’ёмы фінансавання праграмы. Яны скарочаны на 253,2 млн рублёў да 5,43 млрд рублёў, у тым ліку фінансаванне мерапрыемстваў па фарміраванні ў рэгіёне эканомікі высокай якасці, росце дабрабыту грамадзян скарочана на 253,2 млн рублёў да 3,12 млрд рублёў.
Фінансаванне мерапрыемстваў па аднаўленні і нарошчванні індустрыяльнага патэнцыялу зменшана на 468,9 млн рублёў да 1,225 млрд рублёў, а сродкі, што накіроўваюцца ў аграпрамысловы комплекс, павялічаны на 125 млн рублёў да 1,385 млрд рублёў.
Праграма развіцця Прыпяцкага Палесся была прынята напрыканцы 2024 года. Меркавалася, што аб’ёмы яе фінансавання будуць удакладняцца пасля зацвярджэння праграмы сацыяльна-эканамічнага развіцця Беларусі на 2026–2030 гады.