Міністэрства антыманапольнага рэгулявання і гандлю правяло рабочую сустрэчу ў фармаце круглага стала, прысвечаную праблемам працы таксі ў перыяд студзеньскіх снегападаў. Нарада прайшла пад кіраўніцтвам намесніка міністра Алега Дзікуна, паведамілі ў ведамстве.
У абмеркаванні прынялі ўдзел генеральны дырэктар агенцтва «Мінск-Навіны» Андрэй Крывашэеў, прадстаўнікі дыспетчарскіх службаў таксі Мінска, перавозчыкі, члены клуба таксістаў, а таксама прадстаўнікі Мінтранса і Транспартнай інспекцыі.
Удзельнікі сустрэчы разгледзелі, з якімі праблемамі сутыкнуліся кампаніі і пасажыры падчас цыклона «Улі», і як пагодныя ўмовы паўплывалі на кошт перавозак і спажывецкі досвед. Паводле ацэнак удзельнікаў нарады, у пікавы перыяд колькасць аўтамабіляў таксі на лініі скарацілася прыкладна да 60%, час падачы машыны павялічыўся ў 2–2,5 раза, а колькасць выкананых паездак знізілася да 70%. Пры гэтым кошт паездак вырас у сярэднім у 1,5–3 разы.
Па выніках абмеркавання ў МАРГ прапанавалі разгледзець магчымасць заключэння пагадненняў паміж міністэрствам і дыспетчарскімі службамі таксі. Гаворка ідзе пра дамоўленасці аб сацыяльна адказных паводзінах перавозчыкаў і агрэгатараў у перыяды павышанага попыту, выкліканага экстрэмальнымі пагоднымі ўмовамі, правядзеннем буйных міжнародных мерапрыемстваў і іншымі форс-мажорнымі абставінамі. Таксама прапануецца наладзіць інфармацыйнае ўзаемадзеянне і рэалізацыю сумесных сацыяльных праектаў.
