Завод «БелДжы» ў пачатку 2026 года выпусціў 150-тысячны аўтамабіль пад брэндам BelGee.
Як паведамілі ў прэс-службе завода, юбілейным экзэмплярам стаў кросовер BelGee X70. У жніўні мінулага года завяршылася мадэрнізацыя вытворчасці, якая дазволіла нарасціць магутнасць прадпрыемства з 60 тыс. да 120 тыс. аўтамабіляў у год.
Таксама прадпрыемства асвоіла выпуск некаторых аўтакампанентаў, у ліку якіх пярэднія і заднія бамперы. Вытворчасць акумулятарных батарэй, элементаў шумаізаляцыі пярэдніх крылаў, шклоў, арганайзера для інструментаў, штатных прылад выкліку экстраных службаў, колавых дыскаў і шын ажыццяўляецца сумежнымі пастаўшчыкамі, размешчанымі на тэрыторыі Беларусі і Расіі.
Лінейка BelGee уключае чатыры мадэлі: кросоверы X50 і X70, седан S50 і гібрыд X80 PHEV. Па выніках мінулага года беларускі брэнд заняў пятае месца на расійскім рынку.
