Прэм’ер-міністр Аляксандр Турчын прапанаваў Аляксандру Лукашэнку паспрабаваць снюс, каб супакоіцца. Лукашэнка прызнаўся, што яму часам хочацца напіцца.
Турчын перадаў Лукашэнку банку са снюсам — здробненым увільготненым тытунём, і растлумачыў, што яго трэба закладваць пад язык, каб нікацін паступаў у арганізм.
— І што, пад язык кладзеш? — зацікавіўся Лукашэнка.
— І атрымліваеш долю нікаціну, — растлумачыў Турчын.
— То-бок, галава кружыцца?
— Так-так-так.
— Цікава. Часам хочацца напіцца, каб галава кружылася і ад губернатара Гродзенскай вобласці не атрымліваць інфармацыю, што цяляты ў яго дохнуць.
— Давайце я адкрыю, — прапанаваў Турчын, заўважыўшы, што Лукашэнка не можа справіцца з банкай.
— Не трэба, я ж не буду закладваць пакуль, чаго ты.
— Каб супакоіцца, — поясніў Турчын.
— А ён супакойвае? Галоўнае, каб ты ўжо не пачаў супакойвацца гэтым.
Сёння Лукашэнка правёў нараду з кіраўніцтвам Савета міністраў. Сярод абмяркоўваемых тэм — узмацненне ліцэнзавання гандлю электроннымі цыгарэтамі. Лукашэнка выказаў здагадку, што залішнія абмежаванні могуць прывесці да падпольнага гандлю.
«Я, наогул-то, у курэнні слаба разбіраюся, як і ў алкаголі. Таму хацелася б ад спецыялістаў, якія або паляць, або ўніклі ў гэтую тэму, каб растлумачылі, што гэта такое. Кажуць, што гэта горш, чым тытунь. Паслухаем і прымем адпаведнае рашэнне. Самае галоўнае — я катэгарычны праціўнік як алкаголю, так і курэння. Але курэнне — гэта жах. Ну выпіў там 100 грам… Хто не п’е? П’юць. А паліць — гробіць сваё здароўе, калі медыкі ўжо дакладна ведаюць, што рак лёгкага — першапрычына — гэта курэнне.
Паспрабуем знайсці раўнавагу. Давайце абмяркуем і прымем, як я ўжо сказаў, адпаведнае рашэнне», — заявіў Лукашэнка.
Таксама абмяркоўваліся ўрэгуляванне неплацежаздольнасці арганізацый і падзеж жывёлы. Лукашэнка таксама вярнуўся да тэмы асвятлення на вуліцах і заявіў, што ўключэнне асвятлення на 10 хвілін пазней дазволіць падняць пенсіі або пабудаваць новыя малочна-таварныя комплексы.
