Прэзідэнт ЗША Дональд Трамп зноў пачаў пагражаць Ірану бамбардзіроўкамі. Яны могуць пачацца, калі Тэгеран не пагодзіцца на ўмовы ЗША.
«Калі выказаць здагадку, што Іран пагодзіцца выканаць дасягнутыя дамоўленасці (што, бадай, з’яўляецца вялікім дапушчэннем), то ўжо легендарная «Эпічная лютасць» падыдзе да канца, і высокаэфектыўная блакада дазволіць Армузскаму праліву стаць АДКРЫТЫМ ДЛЯ ЎСІХ, уключаючы Іран. Калі ж яны не пагодзяцца, пачнуцца бамбардзіроўкі, і, на жаль, яны будуць значна больш маштабнымі і інтэнсіўнымі, чым раней. Дзякуем вам за ўвагу да гэтага пытання!» — напісаў ён у сетцы Truth Social.
Трэба адзначыць, што раней дзяржсакратар ЗША Марка Рубіа казаў, што «Эпічная лютасць» ужо спыненая, а місія «Свабода» па вывадзе суднаў з Персідскага заліва носіць абарончы характар. Пры гэтым праз некаторы час пасля выказванняў Рубіа Трамп абвясціў пра прыпыненне «Свабоды».
Тым часам СМІ са спасылкай на крыніцы пішуць, што ЗША чакаюць ад Ірана адказу цягам 48 гадзін па аднастаронкавым мемарандуме, які можа пакласці канец вайне, перамовы па ядзернай праграме Ірана пры гэтым працягнуцца яшчэ 30 дзён.
