Прэзідэнт ЗША Дональд Трамп назваў НАТА «папяровым тыграм» і заявіў, што разглядае магчымасць выхаду ЗША з альянсу пасля таго, як саюзнікі адмовіліся далучыцца да вайны ў Іране. Пра гэта ён сказаў у інтэрв’ю брытанскаму выданню The Telegraph 1 красавіка.
На пытанне, ці перагледзіць ён сяброўства ЗША ў НАТА пасля заканчэння вайны ў Іране, Трамп адказаў: «О так, я сказаў бы, што гэта не падлягае абмеркаванню. Мяне ніколі не ўражвала НАТА. Я заўсёды ведаў, што гэта папяровы тыгр. І Пуцін, дарэчы, таксама гэта ведае».
Паводле слоў Трампа, ён лічыў, што краіны НАТА павінны аўтаматычна ўдзельнічаць у дэблакадзе Армузскага праліва, гэтак жа як ЗША дапамагалі Украіне.
«Я не праводзіў вялікай агітацыі. Я проста сказаў: “Эй”, ведаеце, я не надта настойваў. Я проста лічу, што гэта павінна адбывацца аўтаматычна.
Мы заўсёды ўдзельнічалі аўтаматычна, уключаючы Украіну. Украіна не была нашай праблемай. Гэта быў тэст, і мы былі побач з імі, і заўсёды былі б побач. А яны не былі побач з намі», — растлумачыў прэзідэнт ЗША.
Трамп таксама папракнуў Вялікабрытанію за адмову далучыцца да вайны супраць Ірана і заявіў, што ў краіны няма флоту, а авіяносцы — занадта старыя.
Дзяржсакратар ЗША Марка Рубіа заявіў учора, што ЗША перагледзяць свае адносіны з НАТА пасля заканчэння вайны з Іранам.
«Калі нам трэба, каб яны дазволілі нам выкарыстоўваць іх ваенныя базы, іх адказ — «не»? Тады навошта мы ў НАТА?» — заявіў Рубіа.
