Спікер Сейма Літвы Юозас Олекас дапускае, што адносіны Вільнюса і Мінска могуць змяніцца. Пра гэта ён заявіў у інтэрв’ю LRT.
Олекаса папрасілі пракаментаваць заяву дарадцы прэзідэнта краіны Дэйвідаса Матулёніса пра магчымае аднаўленне транзіту беларускага калію пасля аслаблення санкцый ЗША ў выпадку павелічэння амерыканскай ваеннай падтрымкі.
«Я не хачу раскрываць усе закулісныя падрабязнасці таго, дзе праходзяць перамовы. Як вы ведаеце, сёння ў Сейме мы адклалі прыняцце падрыхтаванай намі рэзалюцыі, каб знайсці магчымасці для абмеркавання розных варыянтаў, бо нам патрэбная бяспека, нам патрэбны эканамічны рост, і гэта не заўсёды дасягаецца толькі жорсткай пазіцыяй, але і праз дыпламатычныя каналы, і менавіта таму ўзнікаюць такія прапановы», — сказаў ён.
На прамое пытанне пра магчымыя змены ў адносінах літоўскіх і беларускіх уладаў Олекас адказаў сцвярджальна.
«Ну так. Мы спадзяёмся, што спачатку будуць вызвалены ўсе палітычныя зняволеныя, што наш затрыманы транспарт вернецца, і менавіта таму мы вядзём перамовы. У першую чаргу, мы вядзём перамовы на тэхнічным узроўні і самі з Беларуссю, а на палітычным узроўні — праз нашых саюзнікаў», — сказаў ён.
У той жа час ён лічыць пытанне, ці павінна Літва змяніць палітыку ў адносінах да Беларусі, складаным.
«Гэта вельмі складанае пытанне. Думаю, нам усім варта радавацца і віншаваць людзей, вызваленых пасля 4 гадоў зняволення. Заўтра я сустрэнуся з Алесем Бяляцкім, магчыма, сустрэнуся з іншымі, каб абмеркаваць, што мы можам зрабіць, каб палегчыць жыццё беларускага народа. І, вядома, такая жорсткая пазіцыя з санкцыямі, з ціскам дае пэўны вынік, але не канчатковы. Таму мова нашых саюзнікаў, мова амерыканцаў — гэта, як кажуць, палітыка пугі і перніка.
У нас ужо, верагодна, некалькі сотняў — мы можам налічыць амаль 200 — вызваленых палітвязняў і вядомых дзеячаў. Вядома, паўстала і пытанне гандлю, але мы аб’ядноўваемся, кансультуемся і абмяркоўваем з партнёрамі, з саюзнікамі як на ўзроўні НАТА, так і на ўзроўні Еўрапейскага саюза, каб дасягнуць найлепшага магчымага выніку: каб рэжым не адчуваў сябе пераможцам, каб ні Літва, ні дэмакратычныя еўрапейскія дзяржавы не прайгралі, і каб палітвязні змаглі здабыць свабоду», — сказаў ён.
