Аб’яднаны пераходны кабінет прывітаў вызваленне журналіста і прадстаўніка польскай меншасці ў Беларусі Анджэя Пачобута. Пра гэта гаворыцца ў заяве, апублікаванай 30 красавіка.
Аўтары выказалі падзяку ўсім, хто дамагаўся вызвалення Пачобута: ЗША, польскім уладам і грамадскім дзеячам, еўрапейскім структурам, беларускім дэмакратычным сілам і актывістам.
“Вызваленне Анджэя Пачобута не змяняе сутнасці рэжыму, які яго зняволіў. Яно стала магчымым на фоне працяглага міжнароднага ціску, які ажыццяўляецца Еўрапейскім саюзам і ЗША ў дачыненні да незаконных уладаў у Беларусі за бесперапынныя маштабныя рэпрэсіі супраць беларускага грамадства. Лічым найважнейшым прыярытэтам працягваць працу, накіраваную на вызваленне ўсіх палітычных зняволеных у Беларусі, колькасць якіх перавышае 900 чалавек”, – падкрэслілі яны.
Заяўнікі заклікалі партнёраў у дэмакратычных краінах не забываць пра працягваюцца маштабныя палітычныя рэпрэсіі ў Беларусі, ахвярамі якіх сталі сотні тысяч чалавек.
“Лукашэнка падазраецца ў здзяйсненні злачынстваў супраць чалавечнасці ў дачыненні да беларускага народа, у сувязі з чым распачата адпаведнае афіцыйнае расследаванне Пракурора Міжнароднага крымінальнага суда ў Гаазе. Адначасова Лукашэнка падазраецца ў незаконным перамяшчэнні ўкраінскіх дзяцей-сірот з часова акупаваных тэрыторый Украіны ў Беларусь, а таксама ў здзяйсненні акта агрэсіі супраць Украіны. Не спыняецца і гібрыдная агрэсія ў дачыненні да краін-суседзяў Беларусі, членаў Еўрапейскага саюза”, – падкрэсліваюць яны.
У АПК заклікалі Еўрасаюз працягваць ціск на рэжым Лукашэнкі і не весці з ім камунікацыю без удзелу дэмакратычных сіл і грамадзянскай супольнасці Беларусі.
«Мы падтрымліваем высновы Еўрапейскага Саюза ад 19 лютага 2024 года з заклікам да функцыянальных уладаў Беларусі пачаць сапраўдны і інклюзіўны дыялог з усімі часткамі беларускага грамадства. Будучыню Беларусі нельга вырашаць без беларусаў», — гаворыцца ў заяве.
