Беларуская дэлегацыя назірае за парламенцкімі выбарамі ў М’янме. У яе ўвайшлі намеснік старшыні Цэнтрвыбаркама Аляксей Башан, дэпутат Аляксандр Шпакоўскі і член Савета Рэспублікі Сяргей Мялешкін.
Як паведамілі ў ЦВК, дэлегацыя сустрэлася з кіраўніцтвам М’янманскага інстытута стратэгічных даследаванняў. Абмяркоўваліся рэгіянальная абстаноўка, унутрыпалітычная сітуацыя ў краіне і правядзенне выбарчай кампаніі. Прадстаўнікі дэлегацыі падзяліліся «вопытам правядзення выбарчых кампаній» у Беларусі.
Выбары ў М’янме пачнуцца 28 снежня. Яны пройдуць у тры этапы. Таксама галасаванне адбудзецца 11 і 25 студзеня. Павінны быць абраныя члены Палаты нацыянальнасцяў, Палаты прадстаўнікоў Асамблеі Саюза і чатырнаццаці заканадаўчых сходаў штатаў/рэгіёнаў.
Гэтыя выбары стануць першымі пасля ваеннага перавароту, які адбыўся ў 2021 годзе. Чарговыя выбары павінны былі прайсці ў 2023 годзе, але яны не адбыліся з-за надзвычайнага становішча.
