Савет Міністраў пастановай №752 ад 23 снежня зацвердзіў дзяржпраграму «Забеспячэнне правапарадку» на 2026–2030 гады. Дакумент сёння апублікаваны на Нацыянальным прававым інтэрнэт-партале.
Праграма ў асноўным прадугледжвае развіццё інфраструктуры органаў унутраных спраў, унутраных войскаў і дэпартамента выканання пакаранняў. Адзначаецца, што ў 2021–2025 гадах былі пабудаваны шэсць аб’ектаў органаў унутраных спраў, 10 аб’ектаў унутраных войскаў і два аб’екты крымінальна-выканаўчай сістэмы.
“У той жа час у аператыўным кіраванні МУС маецца значная колькасць будынкаў, якія не ў поўнай меры адпавядаюць санітарным, супрацьпажарным, ведамасным рэжымным патрабаванням, знаходзяцца ў нездавальняючым тэхнічным стане. У сувязі з гэтым неабходна працягнуць мерапрыемствы па прывядзенні іх у адпаведнасць з дзеючымі нарматыўнымі дакументамі па бяспечнай эксплуатацыі”, — гаворыцца ў тэксце праграмы.
Дзяржпраграма прадугледжвае вырашэнне трох задач:
- паляпшэнне стану і тэхнічнай аснашчанасці інфраструктуры з мэтай павышэння эфектыўнасці выканання задач, што стаяць перад органамі ўнутраных спраў, захавання законных інтарэсаў грамадзян, грамадства і дзяржавы;
- інфраструктурнае забеспячэнне ўнутраных войскаў МУС;
- размяшчэнне, стварэнне ўмоў побыту для асуджаных і грамадзян, а таксама бяспечных умоў для нясення службы супрацоўнікамі і грамадзянскім персаналам крымінальна-выканаўчай сістэмы.
Плануецца пабудаваць і рэканструяваць 12 аб’ектаў органаў унутраных спраў, 10 аб’ектаў унутраных войскаў МУС і 4 аб’екты крымінальна-выканаўчай сістэмы. Аб’ём фінансавання праграмы вызначаны ў 571,1 млн рублёў. У прыватнасці, плануецца пабудаваць ІЧУ ў Пінску, будынкі РАУС у Петрыкаве, Светлагорску, Смаргоні, Клімавічах, будынак ДАІ ў Бабруйску. Будуць пабудаваны інтэрнаты на тэрыторыі вучэбнага цэнтра МУС у вёсцы Гарані Мінскага раёна. Новы вучэбны корпус і інтэрнат атрымае Акадэмія МУС. Ваенныя гарадкі рэканструююць у в/ч 5448, 5529, 3214.