Віцэ-прэм’ер расійскага ўрада Аляксандр Новак запэўніў, што ў РФ дастаткова паліва.
“У нас паліва на рынку дастаткова”, — сказаў ён, перадае ТАСС.
Заява Новака прагучала на фоне навін пра рэгулярныя атакі на расійскія НПЗ і паведамленняў пра тыя ці іншыя абмежаванні на продаж паліва ў рэгіёнах Расіі і на акупаваных ёю тэрыторыях Украіны.
“Цяпер ідзе перабудова лагістычных сувязяў сістэмы з улікам патрэб. Балансаванне рынку запатрабуе пэўнага часу”, — сказаў ён.
Новак таксама паскардзіўся на ажыятаж, які штучна павялічыў попыт на паліва на 20–30%.
“Ажыятаж дастаткова вялікі, які прыкладна на 20–30% павялічыў попыт штучна”, — сказаў ён.
Разам з тым Новак не выключыў далейшыя абмежаванні на вываз паліва з Расіі. Гаворка ідзе пра забарону экспарту дызельнага паліва для вытворцаў. Такое рашэнне будзе абмяркоўвацца на сённяшняй нарадзе.
