Расія выклікала пасла ў Арменіі Сяргея Капыркіна ў Маскву для кансультацый у сувязі з крокамі армянскага кіраўніцтва па збліжэнні з Еўрасаюзам, якія наносяць шкоду ўзаемадзеянню ў рамках ЕАЭС, паведаміў МЗС РФ.
Адкліканне пасла адбылося пасля падпісання 29 мая ў Астане сумеснай заявы лідараў Беларусі, Казахстана, Кыргызстана і Расіі. У дакуменце бакі заявілі пра «істотныя рызыкі» для эканамічнай бяспекі членаў ЕАЭС у сувязі з курсам Арменіі на ўступленне ў ЕС і падтрымалі правядзенне ў Арменіі агульнанацыянальнага рэферэндуму аб выбары паміж ЕС і ЕАЭС. Таксама падпісанты даручылі падрыхтаваць да снежня даклад аб магчымых наступствах прыпынення дзеяння дамовы аб ЕАЭС у дачыненні да Арменіі.
Раней міністр энергетыкі Расіі Сяргей Цывілёў папярэдзіў Ерэван аб магчымай дэнансацыі пагаднення 2013 года аб бяспошлінных пастаўках газу, нафтапрадуктаў і алмазаў, калі Арменія працягне курс на ўступленне ў ЕС. Арменія пацвердзіла атрыманне ліста і заявіла, што вывучыць яго і адкажа па меры неабходнасці.
