Прыкладанні беларускага «Альфа-Банка» выдалілі з App Store. Пра гэта паведамілі ў прэс-службе фінансавай установы. Прычына выдалення — санкцыі.
«Проста цяпер мы атрымалі апавяшчэнне ад Apple, што наш INSNC (а таксама старое прыкладанне InSync) і Альфа Бізнэс Мабайл 2.0 часова выдалены з App Store. Як напісана ў апавяшчэнні, гэта звязана з санкцыямі», — гаворыцца ў паведамленні банка.
«Альфа-Банк» раіць кліентам не выдаляць прыкладанні са сваіх смартфонаў, інакш іх нельга будзе ўсталяваць нанова, а таксама прапануе скарыстацца вэб-версіяй INSNC або анлайн-версіяй другога прыкладання.
«Прыкладанні для Android і Huawei па-ранейшаму знаходзяцца ў сторах і стабільна працуюць», — дадалі ў банку, паабяцаўшы, што будуць падаваць апеляцыі.
Санкцыі ў дачыненні да «Альфа-Банка» былі ўведзены ў межах 19-га пакета абмежаванняў Еўрапейскага саюза. Яны ўступілі ў сілу з 2 снежня.