У Вярхоўнай Радзе Украіны прайшло пасяджэнне дэпутацкай групы «За дэмакратычную Беларусь». У ім прынялі ўдзел дарадца Святланы Ціханоўскай па парламенцкім супрацоўніцтве Анатоль Лябедзька, прадстаўніца дэмакратычных сіл Святлана Шаціліна і дырэктар праграмы расійскіх і беларускіх даследаванняў Яраслаў Чарнагор.
На пасяджэнні абмяркоўваліся заканадаўчыя ініцыятывы па прававым статусе і інтэграцыі беларусаў ва Украіне. Было прапанавана, каб дэпутаты бралі пад патранаж асобныя кейсы беларусаў, напрыклад, звязаныя з добраахвотнікамі і валанцёрамі. Таксама абмяркоўвалася далучэнне ўкраінскіх дэпутатаў да ініцыятывы Libereco, паведамляе Офіс Ціханоўскай.
Таксама ў парадку дня былі пытанні арганізацыі і правядзення канферэнцыі «Шлях да свабоды» і Форуму Астрожскіх. Бакі разгледзелі магчымасць выкарыстання досведу Вярхоўнай Рады Украіны пры падрыхтоўцы пакета праектаў рэформ і законаў «Пазітыўная альтэрнатыва».
Святлана Шаціліна прадставіла «Місію дэмакратычных сіл Беларусі ва Украіне». Бакі абмеркавалі магчымасць супрацоўніцтва з місіяй.
Асобна была разгледжана магчымасць правядзення сустрэчы Альянсу дэпутацкіх груп «За дэмакратычную Беларусь» у Кіеве ў 2027 годзе.
